segunda-feira, 13 de fevereiro de 2017

Sistema Kontrolu Fornesimentu Bee Moos Seidauk Di’ak

PARTILHAR

DILI, (ANTIL) – Jeralmente sistema distribuisaun bee moos ba komunidade iha kapitál Dili funsiona hela maibé prosesu operasaun, manutensaun no sistema kontrola rekoñese seidauk di’ak.

Kestaun ne’e hato’o hosi Diretór Diresaun Nasionál Servisu Agua (DNSA), Gustavo da Cruz ba ANTIL iha nia servisu fatin, Kaikolim Segunda (13/2) kona-ba funsionamentu operasaun ba sistema ne’ebé seidauk di’ak.

“Durante ne’e, dirijente, xefe departamentu no xefe sesaun sira ladun kontrola di’ak operadór sira atu halo operasaun ba sistema rasik no sira ladauk sente nia kna’ar fó impaktu ba vida moris povu nian”, hateten nia.

Tuir nia, dalaruma akontese interupsaun hosi sistema maibé la-atua lalais tanba falta responsabilidade servisu no meius rekursu umanu sira no limita kapasidade operadór,

“Ezemplu, iha estasaun balun mak eletrisidade la normál, automatikamente la-funsiona hotu, maibé operadór la ativu halo monitorizasaun ba aktu ne’e, dalaruma komunidade sira mak halo fali reklamasaun foin loke fali bomba”, haktuir nia.

Tanba menus rekursu no seiduak iha jestaun di’ak, operadór balun servisu iha estasaun rua ou liu hodi rezulta servisu ladun efetivu no efisiénsia ba operasaun nian hodi difikulta distribuisaun bee moos ba konsumidór sira.

Enkuantu atu rezolve preokupasaun ne’e, Diretór DNSA, Gustavo da Cruz hateten, estatuta ba DNSA tenke transforma hodi sai diresaun ne’ebé jere rasik iha parte operasaun sira atu bele garantia operadór sira iha periodu operasaun.

Bainhira estatuta mak nafatin ba funsionariu públiku nian ne’ebé kesi ho lei funsaun públika ita la-konsege regula funsionariu operasionál ne’ebé sai operadór di’ak iha nia kna’ar. (jornalista: Zezito Silva; editora: Rita Almeida)

Foto: Diretór Diresaun Nasionál Servisu Agua (DNSA), Gustavo da Cruz ba ANTIL iha nia servisu fatin, Kaikoli, Segunda, (1302). Foto ANTIL/Zezito Silva
PARTILHAR

Author: verified_user

Publicação luso-timorense sem fins lucrativos

0 comentários: