FFTL So Hakruk de’it ba AFC-FIFA, La’os Governu

DILI: Federasaun Futebol Timor-Leste (FFTL) lakohi partisipa iha enkontru triparti ne’ebé organiza husi Sekretariu Estadu Juventude no Desportu (SEJD), ho razaun katak FFTL so haktuir de’it ninia estatutu no estatutu AFC-FIFA.

SEJD organiza enkontru Triparty entre FFTL, LFA ho Klubus futebol, iha Sesta (10/02), hodi ko’alia kona-ba Kongresu ba FFTL ne’ebé tuir planu sei hala’o iha fulan Abril tinan ne’e.

Liu husi karta resposta ba karta konvite triparti husi SEJD, ne’ebé FFTL hasai iha loron 8 Fevereiru 2017, FFTL konsidera SEJD laiha konsiderasaun ba FFTL ne’ebé iha ninia regras no estatutu rasik.

“Materia reuniaun Triparti ne’e Diresaun Ezekutivu no Prezidente Asosiasaun, Prezidente Arbritajen, Treinadores, no mós Asosiasaun Futebol Femenino, konsidera la tuir dalan ho nune’e deside la partisipa iha reuniaun refere,” katak FFTL liu husi karta ne’e.

Tuir FFTL nia interpretasaun katak, reuniaun ne’e la justu no hanesan fali atu halo julgamentu públika ba FFTL.

“FFTL ne’ebé eziste iha Timor-Leste sei buka hatene no halo tuir regras no leis ne’ebé vigora, maibé FFTL sei halo tuir ninia estatutu rasik o estatutu AFC-FIFA nudar organizasaun ne’ebé hamahon FFTL,” karta ne’e afirma.

Tuir karta ne’ebé asina mós husi Prezidente Arbritrajen Gelasio da Silva Carvalho ne’ebé foin lalais ne’e hetan sansaun hodi selu multa osan rihun $3 tanba kazu falsifakasaun dokumentus, hatete sansaun husi AFC ba Ekipa Selesaun Timor-Leste so ba de’it Asia Cup 2023 no la afeita ba jogus internasional sira seluk.

“FFTL rasik sei kontinua hala’o nia funsaun hanesan baibain (normal), no relasiona ho sansaun administrativa ne’ebé FFTL hetan sei rejolve internalmente,” deklara karta ne’e. (*)

Ola Timor - Editór: Tellukoro Jorgin – Foto: Karta resposta husi FFTL ba SEJD ne'ebe olatimornews asesu husi fonte balun.