DILI,
(TATOLI) - Prezidenti Repúblika (PR) Francisco Guterres Lú Olo apresia ho
servisu tomak ne’ebé Ministru Estadu, Koordenadór asuntu Ekonomia no Ministru
Agrikultura no Peskas, Estanislau Aleixo da Silva halo, maibé kontinua husu atu
halo esforsu hodi evita importasaun.
“Propoin
atu serbisu ida ne´e tenki hametin ba oin nune´e Timor-Leste nia ekonomia bele
sai di´ak hodi evita importasaun,” Estanislau Aleixo da Silva konta
tuir PR nia liafuan ba jornalista sira iha Palásiu Prezidénsia Repúblika,
Bairu-Pité, Dili, Sesta ne´e.
Ohin
ministru Estanislau Aleixo da Silva sorumutu ho Prezidenti Repúblika, Dr.
Francisco Guterres Lú Olo, hodi informa progresu ne´ebé atinji hosi Ministériu
Estadu, Koordenadór asuntu Ekonomia (MEKAE) no Ministériu Agrikultura no
Peskas.
Estanislau
Aleixo da Silva relata ba PR Lú Olo serbisu ne´ebé MEKAE hala´o iha área
koordenasaun ekonómika no serbisu ne´ebé maka hala´o iha área agrikultura iha
tinan rua ho balun.
Nia
esplika progresu ne´ebé maka MEKAE atinji maka hanesan estabelese Gia Reforma
Dezenvolvimentu Ekonómiku, hadi´a ambiente ekonómiku liu-liu kuadru legál,
haree kona-ba rejistu komersiál liu-liu sistema lisensiamentu, lei sosiedade
komersiais, halo revisaun ba Serbisu Rejistu no Verifikasaun (SERVE) nian (uluk
rejistu kompaña lori loron 90 maibé agora lori loron 3-5 de´it), uniforme
sistema rejistu, estabelese janela únika ba promosaun investimentu maka hanesan
Trade Invest.
Aleinde
ne´e, informa mós, MEKAE serbisu hamutuk ho liñas ministeriais hodi haree
kona-ba polítika turizmu ne´ebé aprova tiha ona, halo planifikasaun ba
agrikultór sira, aprova lei arbitrazen, lei exportasaun, lei rekoperasaun
impreza sira, serbisu hamutuk ho liña ministeriál sira kona-ba lei investimentu
hanesan Timor-Leste Cement no Pelican Paradise, serbisu hamutuk ho Ministériu
Obras Públikas kona-ba aviasaun sivíl, harii Jardim Botániku iha Remexio, harii
Parke Kay-Rala Xanana Gusmão iha Aileu, aprova lei Florestas, Lei
Biodibersidade no sira seluk tan.
Iha
biban ne´e, Prezidenti Repúblika apresia ho progresu ne´ebé maka atinji hosi
ministériu ne´ebé maka lidera hosi Ministru Estanislau no propoin atu serbisu
ida ne´e tenki hametin ba oin nune´e Timor-Leste nia ekonomia bele sai di´ak
hodi evita importasaun.
Jornalista:
Xisto Freitas, Editór: Manuel Pinto
Foto:
Ministru Estadu, Koordenadór asuntu Ekonomia no Ministru Agrikultura no Peskas,
Estanislau Aleixo da Silva, ko´alia ba jornalista sira.
Sem comentários:
Enviar um comentário