sábado, 19 de maio de 2018

Prokurador indonéziu sira husu kastigu mate ba relijiozu radikal islámiku


Iha loron-sesta ne'e, prokurador indonéziu sira husu ona kastigu mate ba suspeitu líder hosi grupu estremista Estadu Islámiku iha Indonézia, relijiozu Aman Abdurrahman, ne'ebé hetan akuzasaun haruka halo atake sira hahú hosi kadeia, inklui atake suisidu iha tinan 2016.

Entre atake sira ne'ebé Aman Abdurrahman haruka halo, destaka ba atentadu suisidu ida iha kapital nasaun nian, Jakarta, iha fulan-Janeiru 2016, ne'ebé halo ema sivil na'in haat no atakante na'in haat mate.

Tuir Prokuradoria Jeral, relijiozu "konsege espalla radikalizmu no komunika ho nia partidáriu sira liuhosi vizita sira ho tuir vídeo sira".

Polísia halo deskrisaun hosi Abdurrahman, ho tinan 45, ne'ebé nia naran Oman Rochman, hanesan tradutor prinsipal indonéziu hosi propaganda Estadu Islámiku nian no líder hosi Jemaah Anshourut Haulah, rede ida ne'ebé iha kuaze grupu ruanulu resin ne'ebé maka harii iha tinan 2015.

Polísia na'in 100 resin hosi unidade antiterorista sira ho paramilitar sira halo ona protesaun ba julgamentu ne'ebé akontese iha klima tensaun ida hafoin atake oioin ne'ebé maka reivindika hosi grupu estremista iha loron hirak ikus ne'e.

Atentadu suisidu sira iha loron-domingu no iha loron-segunda, iha Surabaya, sidade boot daruak iha Indonézia, halo ema na'in 26 mate, inklui agresor na'in 13. Família rua halo ona atake sira ne'ebé partisipa mós hosi labarik sira ho tinan hitu.

Atake sira iha loron-domingu, hasoru igreja kristaun tolu, hanesan atake aat liu iha Indonézia dezde atentadu sira iha tinan 2005, iha Bali, ne'ebé halo ema na'in 20 mate no ema atus resin kanek.

SAPO TL ho Lusa

Sem comentários: