domingo, 19 de agosto de 2018

ASN Kupang Konfesa Sosa Kilat AK-47 Husi Timor Leste


KUPANG: Autoridade Diresaun Jeral no Investigasaun Polisia Rejional NTT, asegura funsionariu públiku estadual (Aparatur Sipil Negara—ASN) ho inisial JAB no ema Kupang seluk ho inisial JHM tanba rai kilat.

Tuir informasaun ne’ebé públika iha Kompas.com Sabadu (11/08), Diretór Investigasaun Jeral Kriminal Polisia Rejional NTT, Komisariu Alto Yudi Sinlaeloe hatete, rezultadu interogasaun provizoriu, autór na’in rua hatete sira sosa kilat husi Timor Leste.

"Kona-ba rai kilat refere, sira na’in rua konfesa hetan kilat liu husi meius sosa husi povu Timor Leste, no uza atu kasa animal de’it,” dehan Yudi iha Kupang, Sabadu (11/8/2018).

Maibé, Yudi hatutan, nia parte la fiar kedan deklarasaun ne’e, nune’e sei dezenvolve liu tan kona-ba rai kilat no objetivu halo transaksaun kilat.

“Liliu ba membru ASN refere,” katak Yudi.

Aleinde ne’e, Yudi hatutan, nia mós duvida ho lia-fuan husi suspeitu sira ne’ebé hatete katak kilat ne’e sira uza de’it ba kasa animal.

Tanba, nia dehan, modelu kilat refere la’os ba kasa nian. Suspeitu na’in rua mós la’os Perbankin.

“Daudauk ne’e suspeitu na’in rua asegura no detein ona, no mós prosesa tuir lei ne’ebé vigora,” katak nia.

Molok ne’e, tuir públikasaun husi Kompas.com, Polisia Rejional NTT, kaptura funsionariu públiku estadual ida ne’ebé servisu iha Kesbangpol NTT ho inisial JAB.

Mane ho idade tinan 42 ne’e hetan kapturasaun tanba lori kilat ho tipu AK-47.

Xefe Relasaun Públika Polisia Rejional NTT, Komisariu Alto Jules Abraham Abast hatete, bainhira kaer, JAB lori hela kilat refere no tula husi mane ida ho inisial MR.

“JAB no MR nu’udar komunidade husi aldeia Air Nona, Postu Administrativu Kota Raja, Sidade Kupang," dehan Jules ba Kompas.com, Kinta (2/8/2018).

Akontesimentu ne’e, Jules hatutan, hahú iha tuku 01.00 madrugada oras lokal. Polisia simu informasaun husi komunidade ne’ebé haree JAB lori kilat sa’e motor marka Honda Vario.

Hafoin simu informasaun refere, mambru polisia movimenta lalais hodi verifika informasaun refere.

“Hafoin duni tuir, ikus mai polisia konsege kaptura autór besik Pisina Air Nona Postu Administrativu Kota Raja," dehan Jules. (*/kompas)

Independente

Sem comentários: