DILI, (TATOLI) – Primeiru-Ministru
(PM), Taur Matan Ruak, hato’o situasaun krítiku iha setembru nia laran ba
Prezidente Repúblika (PR), Francisco Guterres Lú Olo.
Nia esplika situasaun krítiku
ne’e ho sentidu katak fulan ida ne’e (setembru) ba oin Governu depende maka’as
ba promulgasaun orsamentu jerál Estadu 2018 ne’ebé hetan ona aprovasaun hosi
Parlamentu Nasionál no dadaun ne’e Prezidente Repúblika estuda hela.
“Ha’u husu promulgasaun ne’e lais
uitoan di’ak liu, tanba orsamentu ida ne’e krusiál ka determinante loos para estabiliza
difinitivamente tezouru nomós despeza sira iha tinan 2018” , Taur ba jornalista
sira iha Palásiu Prezidente Nicolau Lobato, Bairru Pité, kinta ne’e, hafoin
enkontru ho Xefe Estadu.
Nia hateten saida maka
primeiru-mninistru ko’alia ba PR katak karik demora promulgasaun ne’e Governu
sei infrenta risku, maibé nunka fó presaun ba Prezidente atu promulga, tanba
tenke iha regra ne’ebé la’o tuir.
“Ha’u uluk prezidente repúblika,
tan ne’e ha’u hatene saida maka primeiru-ministru kuandu ko’alia ho PR ne’e halo
nusa, saida maka ha’u tenke hateten no saida maka labele hateten”, Taur
haktuir.
Iha biban ne’e, primeiru-ministru
mós ko’alia ho PR kona-ba preparativu ne’ebé maka Governu halo ba orsamentu
jerál Estadu 2019 no rekorda katak horisehik nia hahú enkontru ho membru
Governu sira atu haree kona-ba saida maka atu halo.
“Orsida loraik ha’u sei hasoru
hikas fali membru Governu sira atu ko’alia kona-ba polítika Governu,
pur-ezemplu oinsá Governu nia polítika atu haree ba merenda eskolár iha
edukasaun, ba subvensaun ne’e polítika Governu oinsá, ba agrikultura,
infraestrutura ne’e oinsá no bainrua sei ko’alia kona-ba prioridade saida maka
tenke halo uluk no saida maka sei halo ikus”, Taur hato’o.
Iha segunda (semana oin), nia
informa sei diskute kona-ba jornada orsamentu 2019 ne’ebé sei partisipa hosi
ministériu hotu-hotu, diretór jerál sira no ajénsia autónomo sira para ko’alia
kona-ba programa saida maka atu halo no presiza orsamentu hira.
Jornalista: Xisto Freitas | Editora:
Rita Almeida
Imajen: Primeiru-Ministru, Taur
Matan Ruak. Imajen GPM
Sem comentários:
Enviar um comentário