Komunidade portugeza iha Díli agradese apoiu timoroan nia ba selesaun

Komunidade portugeza iha Díli agradese ona iha loron-kinta ne'e, ho dalan simbóliku, ho faixa ida ne'ebé instaladu iha estrada ida iha sidade, apoiu maka'as ne'ebé populasaun timoroan fó ba kampaña hosi selesaun iha Kampeonatu Europeu 2016 nian.

"Obrigada Barak Timor-Leste ba apoiu ba ami nia selesaun", bele le iha faixa ne'ebé grupu ida portugés sira haruka halo no tau iha loron-tersa ne'e iha estrada ida iha sentru sidade nian.

Faixa, "asinadu" hosi "komunidade portugeza Timor-Leste nian" iha imajen ida selesaun nian ho tasa Euro 2016 no logo ida ne'ebé tau hamutuk bandeira rua hosi Timor-Leste no Portugal nian.

"Ksolok no entuziasmu ne'ebé populasaun Timor-Leste sira hatudu hanesan estraordiáriu tebes no akollimentu hosi líder nasional sira rasik hanesan maka'as nune'e ami senti obrigasaun moral hodi hato'o obrigada ba Timor tanba apoiu", hatete hosi portugeza ida, ne'ebé envolve iha inisiativa ne'e, ba Lusa no hatutan katak "Timor la toba bainhira selesaun portugeza joga".

Inisiativa ne'e, hosi grupu ida portugés sira iha Timor-Leste hakarak agradese saida maka sira konsidera hanesan apoiu fantástiku ida hosi timoroan sira ba vitória sira hosi Portugal iha Fransa ho karavana naruk sira no bandeira portugeza rihun resin hodi selebra.

Festa boot sira ne'e akontese hafoin enkontru sira iha meia-final no iha final, ho líder istóriku timoroan rasik, Xanana Gusmão, hamutuk hodi halo selebrasaun sira, tuur iha karreta ida nia janela hodi kaer bandeira portugeza.

Ema portugés sira iha Díli, iha loron hirak ne'e, rona beibeik liafuan parabéns hosi timoroan sira bainhira sira la'o iha estrada no ohin loron Portugal nia vitória merese duni basa-liman ida hosi plenáriu iha Parlamentu Nasional.

"Hodi ha'u nia naran no parlamentu nian ha'u hakarak hato'o parabéns ba Estadu no ba povu portugés tanba selesaun nasional sai duni vensedora hosi kampeonatu Europa nian", hatete hosi prezidente parlamentu timoroan nian, Adérito Hugo da Costa.

"Povu Timor-Leste selebra ona vitória ne'e ho festa boot iha estrada sira Díli nian no iha fatin sira seluk iha nasaun ne'e. Parabéns", nia hatete bainhira hahú sesaun plenáriu iha loron-tersa no hamosu basa-liman maka'as hosi deputadu sira no públiku sira.

Rui Araújo, primeiru-ministru, konfirma ona ba Lusa katak nia hakerek mós ba nia homólogu portugés António Costa hodi hato'o felisitasaun ba konkista europeu futebol nian ne'e.

Vitória portugeza nian domina nafatin rede sosial sira iha Timor-Leste ho vídeo no foto sira selebrasaun nian ne'ebé sai koñesidu no to'o iha televizaun sira iha mundu tomak.

Ba ema barak, imajen sira ne'e hatudu reaproximasaun entre Portugal no Timor-Leste ne'ebé kleur ona la mosu ona.

Hahú hala'o ona petisaun ida hodi husu atu delegasaun ida hosi selesaun portugeza ne'ebé manán Europeu Futebol vizita Timor-Leste, nasaun ida iha planeta ne'ebé maka selebra liu vitória ne'e.

SAPO TL ho Lusa - Foto: António Sampaio/Lusa