XANANA KONVIDA SELESAUN PORTUGAL VIZITA TIMOR LESTE

DILI - Tanba haré  ba Timor-oan barak maka fánatiku tebes ba futebol liu-liu halo pawai hodi suporta ekipa selesaun Portugal nian hodi  ikus mai ekipa ne’e sai duni kampiaun ba euro cup França 2016, Xanana Gusmão promete sei lori ekipa selesaun Portugal mai Timor Leste.

Durante hahú jogu Euro Cup iha França, povu Timor oan barak tebes maka sai adeptus  ba ekipa selesaun Portugal, adeptus sira sempre halopawaihaleu Dili laran bainhira kuandu sira nia ekipa ne’e joga.

Iha jogu final ne’ebe halao iha dia 11 madrugada ekipa Portugal konsege manan França ho skor 1-0 nune’e halo adeptus barak kuaze rihun maka halo pawai haleu sidade Dili.

Xanana Gusmão ne’ebé mós adeptus ba selesaun Portugal hatudu mós nia kontente no alegria ba nia ekipa ne’ebé knsege foti duni taca euro. Xanana hamutuk ho adeptus sira seluk lori bandeira Portugal no Timor Leste komesa haleu sidade no lori hodi harame Dili laran.

Hafoin halo pawai, Xanana hatete ba adeptus Portugal sira katak nia kotente ho espiritu maka’as adeptu sira nian hodi kria pas no dame durante hahú jogu euro to’o remata, tanba ne’e nia promote sei lori ekipa selesaun nasional Portugal mai Timor Leste.  

“Joven sira tomak rona lai mai horseik no hori-bainruak to’o ohin kalan ita kolen uituan, maibé ita nia kolen ne’e lakon derepenti tanba saida maka ita husu, no ita nia hakarak ohin dader ita hotu haré  tiha ona. Ita fo vota, hasai ita nia kontenti, ha’u hatene katak Portugal mós sei senti agrasdesidu tebe-tebes ba ita, ha’u promete ha’u sei halo buat hot-hotu ho ha’u nia esforsu atu Selesaun Nasional Portugal mai iha Timor-Leste,” Xanana Gusmão informa ba adeptus hosi selesaun Portugal iha Timor Leste iha Sentru Konvensaun de Dili (CCD) nia oin, hafoin akompania adeptus sira siste jogu final Euro Cup entre Portugal no França.

Xanana hatete, nia sei lori ekipa selesaun Portugal mai halo jogu Timor Leste nune’e adeptus sira bele haré  no apresia.

Hafoin remata pawai, Xanana husu ba adeptu sira atu fila ba ida-idak nia hela fatin hodi hein iha tempu ida sei lori ekipa selesaun Portugal mai TL.

Xanana rasik apresia tebes ho adeptus sira nia kontribusaun ba kria pas iha rai laran no agradese mós ba adeptu sira nia orasaun hodi ekipa Portugal bele sai duni kampiaun iha Euro Cup ida ne’e.

“Imi fila fila ho di’ak labele kanek, se maka tula oan sira  la’o nei-neik.  Agredese bo’ot  teb-tebes ba imi nia komprensaun, ba imi nia disiplina, imi nia alegria ohin hatudu katak, , ita mós bele hatudu ba mundu, ita iha ulun, ita iha hanoin ita iha hakarak ida, ita sei la’o ba oin nafatin,”xanana fo hanoin.

HNGV Rejista pasiente Tohar

Jogu final euro cup ikus mai ekipa selesaun Portugal konsege manan uma nain Franca ho skor 1-0. Vitoria ida ne’e halo adeptus timor-oan sira halo kedas pawai no rezulta balun ain tohar.

Xefe Departamentu Emerjénsia, Alito Soares hatete, bazeia ba dadus sira hetan Timor oan nain 6 maka hetan asidente trafiku durante loron rua, Dominggu, (10/07)  pasinte mane nain 3, iha Segunda, (11/07) dadersan pawai adeptus Portugal nain 3 tan monu hodi halo tratamentu emerjénsia HNGV nian.

“Ohin (horseik segunda, 11/07 red) asidente trafíku adeptos Portugal nain 3, nain rua kanek kama’an kurtivu tia fila ona ba uma, ida maka tenke baixa tanba kanek grave, ninia kelen maka tohar,”dehan xefe Departamentu Emerjénsia Alito Saores iha nia servisu fatin segunda, (11/07).

Doutor Alito afirma, pasiente asidente tráfiku pawai hó naran Sergio Grilho, idade 13 hosi eskola São Miguel  tenke hetan tratamentu hosi doutor especial ruin nian kuaze semana rua resin tanba tohar grave iha pasiente nia kelen.

Entretantu Aman Pasiente Joaquim hatete, ninia oan ne’e asiste iha uma jogu final entre Portugal hasoru França, e rezultadu ikus Portugal maka manan, ninia oan sai hó ninia kolega ida hó motor kesi bandeira Portugal iha ninia kakorok.

To’o iha dalan bandeira komu naruk no bo’ot liu entaun tama bobar motor nia rays hodi dada labarik ne’e monu hosi motor.

“ohin (segunda,11/07-red) dader siranontongbola, hare’e Portugal manan sira sai, labarik ne’e kesi bandeira Portugal ne’e iha ninia kakorok sai hó ninia kolega hó motor maka bandeira ne’e komu bo’ot demais tama iha rays motor nian, entaun dada nia monu hosi motor,”esplika Joaquim iha sala emerjénsia.

Joaquim realsa, asidente ne’ebé mosu hasoru ninia oan hanesan aman nia simu tanba ne’e hakarak rasik, pasente ne’e hó nia kolega tuir pawai hosi Comoro tesik mai Palacio Governu no monu iha Mandarin oras tuku 7:00 dadersan, e depois evakua ba sala emerjénsia iha tuku 8:00 hodi halo tratamentu médiku.

Portugal Sai Referénsia Ba TL     

                       

Portantu iha sorin seluk, Virgilio da Costa Ornai ne’ebé hanesan Presidente komisaun F ne’ebé trata asuntu desportu no saude hatete, portugal sai hanesan referensia ba Timor-Leste hodi bele aproveita liu hosi koperasaun desportu nian.

“Portugal hanesan mós referensia ida ba ita Timor se bele ita Timor mós bele aproveita liu hosi koperasaun desportu nian katak bele apoiu trinador sira mai iha timor para atu fo treina ba ita nia kampionatu sira ka ita nia jogador sira,”informa Virgilio iha uma fukun Parlamentu Nasional, Segunda, (11/07).

Alende ne’e deputadu Bankada FRETILIN, Eladio Faculto dehan, nia orgullu ho selesaun portugal tanba konsege manan taça euro ba tinan ne’e.

“Ha’u orgulho portugal ninian ekipa nasional ne’ebá ba joga iha França no portugal sai hanesan kampiaun ba jogu futebol no povu Timor-Leste tomak orgulho no haksolok no kuase maioria maka la toba hosi lideransa sira tun ba to’o sidadaun sira,”hatete Eladio.

Polisia Rezista Asidente 3

Komandante Jeral PNTL Komisiáriu Julio da Costa Hornay dehan, durante ihapawaine’e mosu asidenti tolu, entre motorizada maka kose malu no rejulta kanek Kamaan no iha balun bolu malu rejolve tuir familia.

“Ne’e maka informasaun ne’ebé maka ita nia polísia munisipiu Dili relata mai laiha asidente no problema boot ne’ebé maka akontese iha asiste jogu Final kopa eropa nian ne’e,”dehan Julio ba Jornalista iha Kuartel Jeral PNTL, Kaikoli, Segunda, (11/7).

Nia hatutan, komesa kedas kalan polísia halo ona seguransa m’asimu ba iha adeptus ne’ebé maka atu asiste jogu refere to’o pawai haleu Dili laran.

“Ita nia polísia hala’o seguransa másimu iha pawai no durante asiste jogu final ne’e,” informa Julio hornay.

Tuir Observasaun di’ariu ne’e nota katak,pawaine’e organizadu oituan tanba eis primeiru Ministru Xanana Gusmão maka tun direita halopawaihaleu Dili hodi selebra vitória Portugal nian hiit taça Euro ba tinan ida ne’e.

Haluhan pasadu

Xefi Estadu Maior Jeneral Falintil Forsa Defeza Timor Leste (F-FDTL) Maijor Jeneral Lere Anan Timor dehan, Timor Leste fó apoia ba ekipa Portugal tanba hanoin ba pasadu solidaridade ne’ebé maka Portugal fó hodi nasaun ne’e bele hetan nia independénsia.

“Sé uluk Portugal maka nonok deit ita sei la hetan Independensia, tanba ne’e maka ita fó apoia solidaridade ba sira hodi lori taca kopa Euro ne’e,”dehan Lere ba Jornalista iha Kuartel Jeneral F-FDTL, Fatuhada, Segunda (11/7).

Nia hatutan, parabens ba Portugal ne’ebé maka manan ona kopa EURO ba tinan ida ne’e, TL sei suporta nafatin Portugal iha kulaker eventu Futebol nian.

Iha fatin hanesan Ministru Defeza (MD), Cirílo Cristovão mós fó parabens ba Portugal nia susesu iha kopa EURO tinan ida ne’e nian.

“Ha’u fó parabens ba ekipa nasional Portugal, ne’ebé maka hiit ona taça Euro tinan ne’e nian,”dehan Cirílo.(ljm, f10/ mj7/way)

Timor Post