Polisiamentu Komunitaria Ho Parseiru Avalia Programa

DILI, (ANTIL) – Komando Polísia Nasionál Timor-Leste (PNTL) liuhusi departamentu Polisiamentu Komunitaria realiza enkontru annual ho parseiru dezenvolvimentu sira hanesan The Asia Foundation (TAF), BELUN, UNDP no Fundasaun Mahein (FM) ne’ebé maka durante ne’e fó apoiu ba Community Policing Program Management Committee (PMC) atu haree progresu servisu durante tinan 2016.

Komandante Jerál PNTL, Komisariu Júlio da Costa Hornay ne’ebé halo abertura iha enkontru PMC ne’e hatete, komandu apresia ho apoiu parseiru sira nia mai iha PNTL ne’ebé iha avansu boot, liu-liu ba departamentu Polisiamentu Komunitaria tanba hetan konfiansa másimu husi komunidade.

“Husi apoio hirak ne’ebé maka parseiru sira fó, progresu sira ne’e maka hanesan kolokasaun Ofisial Polísia Suku (OPS), Konsellu Polisiamentu Komunitariu (KPK), Konsellu Seguransa Munisípiu (KSM) nia apoiu servisu iha prevensaun konflitu iha nível aldeia, suku to’o mai iha nível nasionál”, Komandante Jerál PNTL hatete iha Kuartel Jerál PNTL Kaikoli, foin lalais ne’e.

Komisariu subliña, antuziasmu PNTL ba programa parseiru sira nian maka kolaka ona OPS hamutuk 442 iha suku, apoiu motorizada atu fó suporta sira nia servisu, laptop 442 prepara atu fahe no tuir planu sei kompleta tan maka radiu komunikasaun no fatin ba membru sira atu servisu.

“Husi rezultadu hirak ne’e la’ós mai mesak husi PNTL maibé hamutuk ho parseiru sira, ita dezenvolve atividade polísia komunitaria nian no ita mós espera katak iha tinan rua oin mai nesesidades importante balun ne’ebé maka tau iha Planu Estratéjiku Dezenvolvimentu Nasionál (PEDN) departamentu Pol’isia Komunitaria sei haree atu bele hetan apoiu ruma husi parseiru sira”, katak tan.

Iha fatin hanesan, Xefe Departamentu Polisiamentu Komuntariu, Superintendente Asistente António da Luz hatutan, objetivu hosi annual metting ne’e halo atu haree progresu servisu polísia komunitariu nian durante ne’e.

“Objetivu husi enkontru ne’e mak komandu PNTL liu husi departamentu polísia komunitariu hamutuk ho parseiru sira organiza atu bele haree kona-ba progresu servisu polísia komunitariu nian hamutuk ho parseiru sira trasa ona iha planu annual ninian ne’ebé maka hetan aprovasaun husi komandante jerál atu implementa iha tinan 2016”, subliña Xefe Departamentu Polisiamentu Komuntariu.

Superintendente Asistente António da Luz akresenta, rezultadu atividade hirak ne’ebé maka hala’o ona iha 2016 no aprejenta iha enkontru ne’e atu bele hetan apresiasaun, sujestaun balun husi komandu no parseiru sira atu bele haree kontinuasaun ba programa polísia komunitaria iha 2017. (jornalista: Manuel Pinto; editora: Rita Almeida)

Foto: Atividade Polisiamentu Komunitariu. Foto PNTL