Importánsia atu iha imunidade molok halo julgamentu ba membru Governu

Deputadu nomós hanesan membru nasionál hosi Komisaun A Parlamentu Nasionál ne’ebé trata kona-ba asuntu Konstitusionál, Justisa, Administrasaun lokál, poder lokál no anti-korupsaun, Arão Noé de Jesus dehan katak tenke iha imunidade karik membru Governu ka orgaun soberanu ida sei atu ba hatan iha justisa, fó sai Suara Timor Lorosa’e. 

Deputadu Arão ko’alia lia hirak ne’e relasiona ho deklarasaun hosi prezidente Tribunál Rekursu, Guilhermino da Silva ne’ebé fó pena prizaun tinan rua la ho imunidade ba prezidente Parlamentu Nasionál, Vicente Guterres, suspeitu ba kazu partisipasaun ekonómika ba iha negósiu.

“Tuir konstituisaun Repúblika Timor-Leste molok atu halo julgamentu ba governante ida iha tribunál, tenke hetan uluk imunidade hosi parlamentu, tanba hanesan prosesu normál”, dehan deputadu.

Prezidente hosi bankada PD, deputada Maria Lourdes Bessa mós hato’o opiniaun hanesan katak kazu hothotu ne’ebé makamembru Governu sira envolve tenke hetan uluk imunidade hosi Parlamentu Nasionál.

SAPO TL ho STL