Derok Masin: “Dalan Di’ak liu Ba Mauk Moruk Mak Kopera Ho Justisa”

Lider partidu CNRT municípiu Baucau, António ‘Derok Masin’ husu ba Lider Conselho Revolusaun Maubere Paulino Gama “Mauk Moruk” atu entrega-an hodi kopera ho justiza tanba ida ne’e úniku dalan ne’ebé di’ak liu ba Mauk Moruk.

“Deklarasaun konaba ha’u nia maun L-7 nian atu tribunál retira KOK ne’e desizaun ne’ebé tribunál fó sai ona hodi fó poder ba polisia ho forsa hodi kaptura ha’u nia maun Mauk Moruk atu atu dada fali ha’u hanoin susar. Sé ida ne’e maka akontese hodi tribunál retira ema barak sei hamriik hasoru tribunál, povu tomak sei hamriik hasoru tribunál atu retira mós sira nian kazu ruma sei pendente hela iha tribunál,” dehan Derok Masin ba Jornal Nacional Diário, depois de partisipa iha seremonia hasa’e bandeira iha komemorasaun loron Restaurasaun Independensia ba dala 13, (20 de Maio 2002-20 de Maio 2015) iha Resinto Administrasaun Munisípiu Baucau Kuarta (20/5).

Nia hatutan katak, di’ak liu mak Mauk Moruk kopera ho justisa para depois wainhira to’o tempu ruma bele hetan indultu husi Estadu, Governu ho instituisaun ne’ebé mak kompetente.

Iha tempu hanesan Ministru Interior Longuinhos Monteiro hateten katak maske hela deit loron ida atu halo fulan rua ba KOK (Komandu Operasaun Konjunta) hodi buka tuir grupo KRM, maibé KOK sei la retira, wainhira seidauk kaptura responsável KRM (Konselho Revolusaun Maubere) Mauk-Moruk.

Ministru Interior ne’e hatutan katak, operasaun sei kontinua hodi to’o alkansa nia objetivu maske operasaun ne’e hetan krítika husi amnestia internasionál.

“Pozisaun governu katak, sé karik iha protesta, iha denunsia husi amnestia internasionál halo favor iha duni komprova tenki ser hatudu duni ninia faktus, i akontesimentu iha ne’ebé, sé maka vítima para depois estadu bele liu husi ninia órgaun sira halo fiskalizasaun ba keixa sira ne’ebé denunsia sira ne’e mai”, dehan Longuinhos Monteiro.

Maibé katak Longuinhos Monteiro, bele krítika maibé Governu no Estadu hamutuk ho nia forsa rua ne’e marka nafatin ninia pozisaun atu ezekuta mandatu governo ninia.

“Tan ne’e forsa sira ne’e sei laretira, ita la halo negosiasaun, estadu hola desizaun atu halo operasaun ho objetivu ida, entaun tenke to’o hetan”, Longuinhos Monteiro fundamenta.

Minstru Interior ne’e akresenta tan katak, krime ne’ebé komete tenki responsabliza iha tribunál.

“Agora tribunál dehan atu los ka sala ne’e problema ketak ida, ne’e Governu la iha interven, la involve, maibé governo nia pozisaun katak prátika de krime mosu ona justifika i autór sira tenki ba responsabliza iha tribunál”, Longuinhos Monteiro esklarese.

Longuinhos Monteiro fudamenta tan katak, operasaun ne’e hala’o para reforsa sistema hotu-hotu.

“Entaun, ejijensia buka Mauk Moruk agora ne’e, la’os ona governu mak buka, mas justisa maka buka. Justisa parte integradu órgaun soberanu ninian, governu mós hola parte, i obrigasaun governu hanesan ezekutór, jestaun governu nian uza ninia meius para depois bele buka i lori mai iha justisa maka hatan”, Longuinhos Monteiro esplika.

Durante operasaun konjunta iha Baucau hetan kooperasaun husi autoridades no komunidade sira mak konsege lori fila ona maluk sira 400 ba justisa no ba komunidade nia let.res

Jornal Nacional