KOMUNIDADE KONTENTI FOLIN FOS TUN ONA

Komunidade senti kontenti, tanba dadaun ne’e folin fos komesa tun fila fali ona. Fos marka AAA 30 kilo U$ 14 to’o 15, antes ne’e U$ 18 to’o U$ 20.

“Ami hanoin folin fos ne’ebe maka agora dadaun iha ne’e ami sente diak ona tanba antes ne’e maka susar tebes ba ami tanba fos kilo 30 fa’an U$ 18, 19 no balu to’o 20 nomos kilo 25 16, 17,”expresa Julia Madeira (komunidade) Pantai-Kelapa wainhira sosa fos dadalia ho JN-Diário Tersa (12/5) iha Merkado Comoro-Dili horseik.

Ho folin ne’ebe tun ne’e husu atu mantein nafatin labele hasa’e fila fali.

“Ami hakarak folin ida ne’e mantein nafatin para ami sira manana osan kik ne’e bele sosa, se lae ami atu sosa fos saka ida deit mos dada iis,”koalia Julia.

Nune’e mos Mateus Santos haktuir, folin fos dala ruma tun sa’e ne’e nia parte preokupa, maibe oras ne’e dadaun tun ne’e nu’udar komunidade apresia ba konsiensia vendedor sira.

“Buat ida folin tun ida ne’e ami senti kontenti tanba ami nia osan lor-loron ne’ebe maka ami hetan oituan deit ne’ebe ami senti kontenti folin tun ona e ami mos apresia ba ita nia vendedor sira ne’e,”Mateus koalia.

Iha fatin hanesan, Marcos Pereira, vendedor Fos iha Merkado Comoro, haktuir, sira hatun folin fos tanba fos ne’ebe maka sira sosa ne’e ninia folin tun.

“Ami hanesan fa’an fos hatun folin tanba fos ne’ebe maka ami sosa ne’e ninia folin tun ne’ebe fos kilo 30 ne’ebe ami antes ne’e fa’an ba $ 18 mai to’o $ 20 agora ami fa’an deit $15. Maibe folin kuandu ami sosa maka nia folin sae pasensia ami mos tenki fa’an tuir ida ne’e,”tenik nia.

Maske nune’e nia parte la esplika klaru folin fos ne’ebe maka sira sosa ne’e tun hodi halo sira hatun folin fos ne’e rasik. alf

Jornal Nacional Diário