KOMPANIA MALANDRU, GOVERNU SEI LA TOLERA

Diretór Jerál Sekretáriu Estadu Para Formasaun Professionál no Empregu (SEPFOPE), Jacinto Barros Gosmão hato’o katak governu sei la tolera kompania ou instituisaun balun ne’ebé viola lei traballadór nian.

“Ita iha lei, ne’e duni ita la tolera ida ne’e,” diretor jerál hateten kestaun ne’e iha Ministériu dos Negósius Estrangeirus no Kooperasaun (MNEK), Praia dos Coqueiros, Díli, Tersa (28/04/2015), tanba kompania no instituisaun balun viola lei traballadór sira nian hodi selu saláriu ba traballadóres sira la tuir estandarte ne’ebé iha, ho saláriu minimu U$ 155 dolares amerikanu.

Maibé nia afirma katak, dalaruma mós problema ne’e mosu tanba tra balladóres sira maka buka serbisu susar no kompetisaun barak, antaun ema fo saláriu la tuir estandarte mós sira simu ona. Maibé tuir lo-los lei bandu, ne’eduni nia konsidera katak dala ruma tarballadores sira maka kontra fali lei.

Nia dehan, TL iha lei kódigu do traballu hodi regula, ne’eduni SEPFOPE sei serbisu hamutuk ho partes hotu hodi habelar no kumpri lei ne’ebé maka iha, tanba dala ruma kompania balun halo violasaun ba direitu traballadóres sira nian.

Nia dehan, lei kona-ba traballadóres sira nian foin maka implementa, tanba ne’e sei iha duni kompania balun maka sei halo violasaun ba traballadóres sira. Maibé nia dehan, bainhira inspetor jerál do traballu SEPFOPE nian haree katak, iha duni violasaun ruma, entaun sei fó multa ba kompania sira atu nune’e sira bele implementa regras ne’ebé maka estabelese ona.

Nia esplika mós katak, kada traballadóres ne’ebé serbisu iha kompania ou fatin seluk hahú hosi inísiu serbisu ho saláriu mínimu maka U$ 115 doleres, maibé depois de serbisu tiha tinan rua (2), maka nia iha ona eskill no kompania mós iha ona lukru, entaun saláriu mós tenki hasa’e uituan. Maibé, atu hasa’e ne’e, la’os governu maka tenke ba halo interven.

“Ida ne’e ita hotu hosi governu, kompania, sosiédade sívil no mós komunidade ita hotu-hotu tenke tau prioriedade hodi hatete ba malu katak, ita nia saláriu mínimu maka U$ 115, maibé ne’e la’os serbisu to’o mate lae, tinan-tinan bainhira kompania hetan lukru tenke hasa’e sira nia saláriu, maibé ninia impaktu ne’e sei iha,” nia esplika.

Nia dehan, iha mós lei kona-ba traballadór internasionais ne’ebé regula katak, traballadór estranjeiru ne’ebé espesialista iha área ruma, entaun bele mai serbisu iha Timor-Leste. No iha área 11 maka sira la bele tama mai, hanesan serbisu kaiseru (Kasir), sikuriti, kondutór, no mós seluk tan.

Maibé diretór jerál ne’e afirma katak, sei iha kompania balun maka sei lori nafatin ema hirak ne’e tama mai ho rajaun oi-oin, ne’e duni atu halo kontrolu ba problema ne’e la’os SEPFOPE mesak, maibé presiza ema hotu serbisu hamutuk hodi hamenus traballadóres hosi estrangeirus.

No mós atu traballadóres Timor-oan sira bele kompete ho traballadóres estranjeiru sira maka oras ne’e dau-daun SEPFOPE prepara ona sentru formasaun akreditadu hamutuk 25 ne’ebé iha hodi traballdores Timoroan sira bele ba tuir formasaun, hodi hasa’e sira nia kapasidade.

Seluk tan maka polítika serbisu bilaterais hodi haruka traballadóres sira ba serbisu iha Korea do Sul no Austrália ho objetivu atu hetan osan no mós dixiplina ho esperiensia serbisu hodi sira fila-fali mai bele serbisu di’ak liu tan hanesan iha ema nia rain. (Jon)

Matadalan