TRABALHADOR IHA TL HAMUTUK 8684

Inspector Geral Trabalho (IGT), Secretariado Estado Politica Formação Profesional e Emprego (SEPFOPE), identifika katak, iha fulan Janeiro to’o fulan Juñu tinan 2015, traballador iha Timor-Leste hamutuk 8684.

“Iha primeiru semester tinan ida ne’e hahu iha fulan Janeiro to’o fulan Junhu, Inspector Geral Traballo liu husi inspector sira halo ona vizita inspeksaun iha 672, husi 672 vizita ne’e ita hetan trabalhador total ne’e 8684,” hateten Inspector Geral e Presidente CNTI, Aniceto Leto Soro ba Jornalista sira iha ninia kna’ar fatinn, SEPFOPE-Caicoli, Dili Tersa (28/07/2015).

Nia hatutan, husi trabalhador 8684 ne’e kompostu husi trabalhador estranjeiro ne’e iha 2112 no trabalhador nasional iha 6572.

“Trabalhador ne’ebe ami konsege rezolve sira nia kazu ne’e iha 1432, sira ninia kazu ne’e ami rezolve, tanba ema halo violasaun ba sira nia direito,” nia dehan.

Kona ba trabalhador infantil, Inpektor jeral ne’e dehan, seidauk halo kontrolu masimu tanba ita nia sei falta lei.

“Primeiru ita seidauk iha lei espesifiku ida kona ba trabalho infantil, agora prosesu ita la’o hela liu husi Komisaun Nasional Trabalho Infantil, ita kria ona komisaun ida ne’e i komisaun ida ne’e halo tiha ona lista ou dekreto lei ida ba trabalho perigosu ba labarik sira, ne’ebe kuandu lista ne’e hotu ona, inspektor sira fasil halo kontrola hodi bandu fase kareta ne’e labele i agora ita seidauk hatene fase kareta ne’e bele ka labele, ita seidauk iha lei ida determina ba asuntu espesifiku ba ida ne’e, tanba ne’e maka ita so halo kontrolu fo sujestaun ba labarik sira ne’e para atu ba eskola,” esplika Inspektur.

Kona ba numeru trabalhador infantil nian iha TL, Inspektur Jeral Trabalho ne’e hateten, numeru ezato ba traballador infantil sira ne’e ita seidauk iha.

“Numero ne’e susar oitoan, ohin ita ba hetan numero hanesan ne’e, aban ita ba fali hetan numeru hanesan ne’e, ne’ebe ita laiha numeru ida ne’ebe mak los ba ema sira ne’ebe serivu ou liu-liu ba alin sira ne’ebe ita konsidera serivu ki’ik,” nia dehan.

Nia haktuor tan, servisu kordenasaun entre SEPFOPE ho Servisu Migrasaun (SM), hodi halo kontrolu ba traballador sira sempre lao nafatin hela.

“Ita servisu hamutuk hela, agora iha planu atu halo operasaun konjunta munisipiu ne’ebe iha teritoriu nasional Timor-Leste hodi identifika ema sira ne’ebe maka uza vistu turista,” dehan nia. mia

Jornal Nacional