Cardeal Pietro Parolin Too Iha Dili, Asina Akordu Bilateral Ho TL

DILI – Reprejentante Papa Fransisco I, Cardeal Pietro Parolin, hamutuk ho nia ekipa too ona iha Dili Kinta, (13/08) tuku 02:00 OTL ho aviaun Sylk Air.

Wainhira too iha Aeroportu Nicolao Lobato Reverendismu Cardeal Pietro Parolin, simu direita hosi administrador Apostoliku Dioseze Dili, Dom Basilio do Nasimento, Amu Bispu Dioseze maliana Dom Norberto Amaral, membru Governu, Padre, Madre, sarani nomos estudante sira neebe mak mai hosi Eskola Katoliku hotu iha Dili laran.

Depois too iha Dili, tuku 5:00 loraik OTL Cardeal Pietro Parolin neebe hanesan mos Sekretariu Estadu Vatikanu nee akompanya hosi Amu Bispu nain 2, membru Governu, sarani nomos siguransa hanesan Polisia Nasional Timor Leste inklui siguransa igreja kontinua halo vijita ba estatua Papa Joao Paulo II iha Tasi Tolu durante oras ida nia laran no iha tuku 06:00 loraik kontinua ba iha Seminariu Maior Fatumeta, hodi misa hamutuk ho seminarista sira inklui mos sarani sira.

Tuir ajenda neebe mak iha Sekretariu Estadu Vatikanu, Cardeal Pietro Parolin, sei halo sorumutu bilateral hamutuk ho delegasaun Timor Leste hodi asina akordu konaba estabelese kuadru juridiku konaba relasaun entre Timor Leste, Santa Se no Igreja Katolika.

Laos nee deit reprejentante Papa Fransisco I nee mos kontinua halo sorumutu kortezia  hamutuk ho Prezidente Parlamentu Nasional Vicente Guteres no iha tuku 11 kontinua halo sorumutu kortezia ho Prezidente Republika, Taur Matan Ruak no iha tuku 5 loraik sei kontinua vijita ba Arkivu no Museum Rezistensia nian no iha tuku tuku 6 loraik sei misa hamutuk ho sarani sira iha Igreja Katedral no remata misa sei han hamutuk ho Primeiru Ministru, Rui Maria de Araujo, inklui membru governu nomos reprejentante Igreja nian. Informasaun kompletu iha STL Jornal no STL Web, edisaun Sesta (14/8/2015). Thomas Sanches

Suara Timor Lorosae