Governu Hakarak Eleisaun Suku Fulan Dezembru PN Konsidera Laiha Posibilidade

VI Governu hakarak eleisaun Xefi Suku atu hala’o iha fulan Dezembru 2015, maibé Parlamentu Nasionál (PN) konsidera laiha posibilidade atu hala’o eleisaun tanba kabe ba Orsamentu Jeral Estadu (OJE).

Membru Komisaun A PN, ne’ebé trata ba asuntu Konstituisaun, Justisa, Administrasaun Públika, Podér Lokál no Anti Korupsaun, deputadu Francisco da Costa hateten katak, mandatu Xefi Suku sira nian hotu iha 15 de Outubru 2015, maibé proposta Governu ne’e mai iha Parlamentu Nasionál hakarak muda ba iha Dezembru 2015. Tanba ne’e mak PN estuda ba mai katak, Dezembru ne’e laiha posibilidade atu bele halo eleisaun ba xefi suku.

“Orsamentu tinan 2015 sei taka iha 15 Dezembru. Sé xefi suku ho liderasan komunitária kompetisaun ne’e iha Dezembru se ema ruma iha pakote 2 ida ou 3 ida kuandu hanesan, entaun ita tenki halo fali re-eleisaun. Sé re-eleisaun ne’e monu iha Janeiru impaktu ba Orsamentu 2015. Hein fali orsamentu 2016 imposivel no lori prosesu kleur tan,”dehan deputadu Francisco ba Jornalista sira iha PN, Dili, Segunda, (14/9/).

Nia hateten tan, iha fulan Dezembru udan bo’ot i tempu natal ema bele halo viajen ba rai liur ba mai entaun ladi’ak nafatin. Tamba ne’e mak Parlamentu Nasionál halo tia ona pareser ida ba iha Governu para atu muda eleisaun ba iha 2016.

“Eleisaun iha 2016 ne’e depende ba kompeténsia Governu hakarak monu iha Janeiru, Fevereiru, Marsu to’o iha Outubru ne’e depende ba Governu, mas lala’ok no régra Governu aprezenta fali proposta mai depois mak ita bele haree,”nia hateten.

Deputadu Francisco hateten tan, lei ne’e muda proposta Governu nia mai mak haree, i nia vantajen no desvantajen ne’e iha ne’ebé no sei estduda hamutuk hafoin bele halo.

Iha fatin hanesan Vise Prezidenti Bankada FRETILIN, deputada Josefa Pereira Soares hateten katak, durante seidauk iha eleisaun xefi suku tuan sei mantein nia servisu to’o eleisaun foun mosu.

“Ha’u hanoin ida ne’e depende ba iha lei ne’ebé ke komisaun A aprova, saida mak ha’u hatene ne’e, ami aprova lei fó prolongasaun de tempu ba xefi suku ida anteriór katak, seidauk iha eleisaun ba xefi suku foun, xefi suku anterior, nia sei mantein nia mandatu to’o iha eleisaun ba iha xefi suku ida foun ninian,”dehan deputada Josefa.eni

Jornal Nacional