OHIN, ESTRANJEIRUS 100 TUIR EZAME NASIONALIDADE TL

Sidadaun Estranjeirus 100 resin ne’ebé hela iha Timor-Leste, ohin Tersa (15/9), sei tuir ezame nasionalidade Timor-Leste (TL) iha edifisiu Diresaun Nasional Rejistu no Notariadu (DNRN), Mandarin, Dili.

Sidadaun estranjeirus hirak ne’e mak hanesan husi nasaun Indonesia no mos nasaun seluk tan ne’ebe sira nia fen ka laen ema Timor oan.

Direktora DNRN, Maria do Rosario Fatima ba jornalista sira hateten, Ministeriu Justisa liu husi diresaun DNRN sei hala’o teste ezame nasionalidade ba ema estrangeirus hamutuk 100 resin durante loron rua hahú husi dia 15 ho’o 16 fulan ne’e.

“Ezame nasionalidade kada Munisípiu, ita halo levantamentu informasaun ne’ebe mak hetan akizasaun ba nasionalidade por casamento no por autorizasaun, kada Munisipíus 12 inklui Oecusse no Munisipíus 12 ita halo tiha ona no aban (ohin red) ne’e so ba Munisípiu Dili deit,” hatete Direktora DNRN, Segunda (14/09), iha Mandarin, Dili.

Direktora DNRN ne’e hatutan,   kriteria ba sidadaun estranjeirus sira atu tuir ezame nasionalidade hodi sai sidadaun Timor-Leste ne’e maka fen ka laen ema Timor oan.

“Sira tenki hela iha Timor tinan rua ba leten, tenki aprezenta sertidaun kazamentu ne’ebe kaben tiha ona tinan lima (5), aprezenta nia (estranjeiru) pasaporte, aprezenta nia laen ka fen nia sertidaun moris, pois nia (estranjeiru ) nia sertidaun moris, kartaun eleitoral ka Bilhete identidade husi husi nia fen ka laen ninian, aprezenta mos prova hela fatin iha Timor ne’e iha ne’ebe, tenki hatene lian ofisial (Tetum ho Portugues) hanesan ida ka rua, tenki hatene kultura no istoria Timor ninian. Teste nasionalidade ne’ebe halo sidadaun estranjeiru ne’e primeiru liu husi ezame eskrita, pois ne’ebe valor diak iha eskrita ne’e bele pasa ba oral no husi oral pasa tan mak foin bele sai sidadaun Timor-Leste. Ba sira ne’ebe mak la liu tinan oin mai sei tuir nafatin,”deklara Maria do Rosario Fatima.

Antes ne’e Ministeriu Justisa fo teste ona ba sidadaun estranjeirus ne’ebe hakarak sai sidadaun Timor-Leste hamutuk 600 resin ona, no husi numeru ne’ebe iha, maioria husi nasaun Indonesia, no husi nasaun sira seluk hanesan Australia, Portugal, Vietnam, China ho Pakistan iha ida rua deit.Des

Jornal Nacional