TERRA MAU BULAK “AMI SENTI DISKRIMINADU”

Dili, Radio Liberdade Online - Portavoz  veteranu no Kombatente sira ne’ebe hetan reforma husi Instituisaun Falintil Forsa Defeza Timor-Leste (F-FDTL),   Terra Mau Bulak, husu ba Governu atu kria kondisaun di’ak ba sira.

Terra Mau Bulak,  hato’o preukopasaun ne’e hafoin  sorumutu ho reprezentante Gabinete Prezidensia Repúblika Kaza Militár, iha Tersa Feira, 15/09/2015, iha Palasíu Prezidente, Aitarak-Laran.

“Ami senti deskriminadu tebes. Ami hetan tiha reforma iha Instituisaun F-FDTL, maibé Governu  la kria kondisaun ida ba ami, liliu seguransa sosiál ba ami nia moris,”  tenik Terra Mau Bulak.

Terra Mau Bulak,  husu mós ba orgaun legislativu atu kria Lei protesaun siguransa sosiál nian ba veteranu no kombatente sira ne’ebé hetan reforma husi instituisaun F-FDTL.

Hatan ba Preokupasaun ne’e, membru komisaun A, Parlamentu Nasionál, deputadu, Jorge Teme hateten, lei siguransa sosiál, liliu ba veteran sira nia moris   ne’e hein hela proposta husi komisaun ne’ebé mak toma konta ba asuntu veteranu nian.

“Nu’udar  komisaun A, ne’e ami nia kompetensia duni, maibé iha mós iha komisaun seluk ne’ebé mak toma konta ba veteran. Sira bele halo proposta para diskuti iha Parlamentu, hodi garante duni   sira ninia estabilidade,” dehan Teme,  iha uma fukun Parlamentu Nasionál, iha loron hanesan.

Eis Ministru ESTATAL ne’e hatutan, Governu iha obrigasaun hodi trata veteranu sira ho dignu tamba sira mak uluk fó-an tomak hodi  luta ba   libertasaun nasionál.

Iha fatin hanesan Prezidente Komisaun F,  Parlamentu Nasionál, Deputadu Virgilho Hornai, ne’ebé  trata asuntu veteranu no edukasaun  hateten, komisaun sei servisu hamutuk ho Minitériu relevante atu kria polítika ida hodi  halo protesaun sosiál ba ema ne’ebe mak durante serbisu ba instituisaun estadu.

Iha loron 20 Augustu, 2015 membru F-FDTL nain 16 reforma [pensiun] husi forsa defeza hafoin dedika sira nia-an iha instituisaun Etadu ne’e kuaze tinan 14. Membru F-FDTL hirak ne’e maiória mai husi Forsa Armada Libtertasaun Nasionál ne’ebé uluk luta hasoru okupasaun militár Indoenezia nian durante tinan 24. 

Rádio Liberdade Dili