terça-feira, 29 de setembro de 2015

KAPTURA BANDAR ILEGAL, PRENDE KARETA EIS SEKRETARIU ESTADU


DILI - Polísia  Nasional Timor Leste (PNTL) liuhosi Servisu Investigasaun Kriminal Nasional (SIKN), kaptura tiha ona bandar jogu SDSB ilegal inklui sidadaun Xineza nain 2, Timoroan nain 13.

Iha operasaun ne’ebé SIKN hala’o iha Domingu kalan (25/09), iha Aldeia Jembatang Besi, Suku Lahane Oriental, Postu Administrativu Nain Feto Munisípiu Dili, ne’e prende mos sasan eviéndia mak hanesan motor lima (5), kareta tolu (3) inklui kareta ida eis Sekretáriu Estadu ho inisiál RN nian no prende osan hamutuk US$ 1.770,000, no kupong mutin ne’ebé  mak sira faan.

SIKN lori kedas autór ho eviénsia hirak ne’e ba hatama iha sela hodi prosesa tuir lei, inklui Xinez nain rua ne’e uza pasaporte turista hodi hala’o atividade ilegal ne’e.

Jornalista Timor Post ne’ebé akompaña SIKN iha operasaun haktuir kronolojia katak, bainhira Polísia  sira too iha uma ne’ebé  mak hala’o  aktividade negósiu  ilegal  ne’e, sidadaun Xineza nain rua ho Timoroan 13 ne’e sura hela osan ne’ebé  mak sira nia kliente sira ba hatama, derepenti polísia tama sira halai fatin la di’ak  no kaptura sira ho evidénsia  kompletu.

Hafoin kaptura no rekolla evidénsia hotu, Komandante SIKN, Superintendenti Rudgeiro Lay,  ba Jornalista sira iha Kuartel Jerál  PNTL, Kaikoli, hatete, evidénsia  sira ne’e sei intrega  ba Ministériu  Públiku  (MP) hanesan nain ba asaun penal, no suspeitu sira ne’e sei detein hela iha sela polísia  munisípiu  Dili durante oras 72 hodi hein prosesu kontinuasaun.(way)

Timor Post

Sem comentários: