LEI PENSAUN VITASIA, LA’OS PD NO CNRT NIA KULPA

Lei Pensaun Vitalísia kontinua sai polémika. Hosi prezidenti repúblika to’o povu baibain preukupa atu halo revizaun ba Pensaun Vitalísia ba eis titulár sira. Sé maka bele hakotu polémika ida ne’e, só partidu sira ne’ebé hetan asentu iha Parlamentu Nasionál.

Maibé, partidu sira ne’ebé iha Parlamentu Nasionál reklama án katak sira la sala. PD dehan, sira minoria entaun susar atu muda lei ne’e. Entretantu, CNRT klarifika katak sira só manán maioria absoluta maka bele muda. Maske nune’e, FRETILIN hakarak muda urjenti.

Deputadu  Bankada Partidu Demokrátiku (PD) no mós hanesan Vise Prezidente PN, Adriano do Nascimento hateten, PD hatama  ninia projetu lei ba prezidenti PN tinan ida (1)resin ona, maibé PD ne’e kadeira ualu (8) dei’t, labele halo buat ida.

“Agora Prezidenti Parlamentu hosi partidu boot CNRT. Iha Parlamentu ne’e kuandu votus barak liu nia maka diside buat hotu-hotu. O votus ki’ik oán ne’e o submete, ne’e demokrásia. Bele hatete Parlamentu falla maibé maka ne’e labele inklui PD,” dehan Adriano iha PN foin lalais ne’e.

Adriano esplika, tuir prosedur atu produz lei ida iha etapa 4 ka 5, primeiru inisiativa mai hosi deputadu ida-idak ka  bankada ou governu. Kona-ba lei pensaun vitalísia ne’e, inisiativa hosi PD mai ona. PD hatama ona tinan ida resin atu halo revizaun. Atu halo revizaun ba lei ne’e, tanba iha tempu ne’ebá bainhira FRETILIN sei kaer ukun, Parlamentu maiora deputadu ne’e hosi FRETILIN halo lei ida pensaun vitalísia ne’e.

“Iha tempu ne’ebá atu responde nesesidade órgaun titulares, komesa hosi Prezidenti Repúblika, Primeiru Ministru, Ministru no Deputadu sira hotu. Agora, ezemplu ida, deputadu sira iha tempu ne’ebá sira nia saláriu báziku quatro centos (400.00) de’it. Lei ne’e mósu ho quatro centos ne’e katak saláriu báziku ne’e simu tomak dei’t,” nia haktuir.

Tan ne’e, nia hatután, PD momentu ne’e konsiente no halo projetu de revizaun (projetu lei), ne’e hatama kuaze tinan ida resin katak, inisiativa iha ona hosi deputadus  bankada PD. Ne’eduni, labele jeneraliza Parlamentu tomak tanba nia  bankada hatama ona hodi kompromete ho kampaña ne’ebé halo iha 2012.

Haree ba realidade ne’ebé seidauk halo alterasaun ba lei PV, Programa Officer ONG Asia Justice And Right (AJAR), Inocêncio de Jesus Xavier hateten, bainhira membru Parlamentu Nasionál (PN) la rona ezijénsia hirak ne’ebé populasaun sira hato’o liu-hosi Prezidenti Repúblika (PR) hodi halo alterasaun ba lei refere. Signifika katak deputadu sira laiha forsa morál polítika.

“Sé sira la halo, sira sei laiha forsa morál polítika,” Inocêncio ba Jornál Matadalan iha ninia serbisu fatin, Farol, Díli, Segunda (31/08/2015).

Nia dehan, sé deputadus sira reprezenta duni povu, entaun sira rona povu nia lian liu-hosi PR ninia vizita sira. Depois de resensu tama maka sira la tau assuntu refere ba ajenda prioridade, ne’e signifika katak sira (membru PN) la reprezenta povu no traisaun ba demokrásia.

Ino haktuir, PR nu’udar símbolu unidade nasionál noiha kompeténsia atu bolu atensaun ba PN.

Iha bibán ne’e, nia mós konkorda katak lalika vota ba partidu sira ne’ebé hetan asentu iha Parlamentu Nasionál iha eleisaun jerál 2017maibé vota ba figura ne’ebé maka bele reprezenta no atu halo buat ruma.

“Di’ak liu halo hanesan iha tinan 2002 nian iha Assembleia Konstituante ne’ebé povu maka hili direta iha distritustanba hili ba figura ne’ebé sira hatene. Labele hanesan agora tau de’it figura balun nia foto,” Ino tenik.

Nia kompara katak PN hanesan dapur ba demokrásia no povu maka liurai tanba povu maka fó serbisu ba sira (membru PN). Maibétanba saida maka povu krekas marán maibé ida ne’ebé maka ba serbisu ne’e riku matak de’it.

Antes ne’e, partidu CNRT halo ninia kongresu extraordinária iha CCD, delegadu sira eziji atu halo revizaun ba lei PV maibé agora la halo buat ida. FRETILIN mós hanesan ne’e no PD mai halo nia proposta de lei ida ba iha ne’ebá no vise prezidente PN Adriano do Nascimento dehan katak “ami halo tiha ona, maibé ami kadeira hirak de’it no ami partidu ki’ik”.

“La’os partidu ki’ik maka povu hili. Povu hili tanba imi nia fuan boot ba nasaun ne’e. Impaktu atu deputadu sira halo revizaun ba lei PV ne’e tanba nia impaktu ne’e maka ne’e, benefísia ba sira nia án. Iha ne’ebé maka lei ne’e di’ak ba nianán, nia hakarak muda,” nia afirma.

Kona-ba deklarasaun ne’ebé hato’o hosi Segundu Vise Prezidente PN, Adérito Hugo katak veteranu sira maka afavor ba lei PV, Ino responde,  katak, labele jeneraliza veteranu hotu benefisia ba lei PV. “Ne’e sala. Ha’u dezafia señor vise Prezidente PN. La’os ema vetaranu hotu-hotu ne’ebé maka benefisia ba lei PV, tanba la’os veteranu hotu-hotu túr iha deputadu. Karik membru veteranus balun ne’ebé nu’udar deputadu maka hetan benefisia, la’os veteranus rihun ba rihun hotu maka hetan benefisia. Ne’e sala,” nia kestiona.

Iha parte seluk, Deputadu  bankada Frente Revolusionáriu Timor-Leste Independente (FRETILIN), Fráncisco Miránda Branco haktuir katak konsiénsia polítika hosi polítiku sira ne’ebéhetan reprezentasaun iha PN konsiente boot tebes ho realidade atuál no presiza altera duni ba lei refere.

“Lei ne’e produs iha tinan 2007. Ita haree tinan ualu (8)ona presiza duni iha alterasaun hodi akomoda ho situasaun real ita nia moris loron-loron nian,” dehan deputadu hafoin partisipa misa dezlutu nasionál nian iha Igreja Katedral, Díli, Kinta (04/09).

Nia dehan, partidu polítiku sira hotu-hotu iha PN konsensu hotu katak presiza duni atu halo alterasaun ba lei ne’e bazeia ba situasaun real. Tuir nia, pensaun ne’e hanesan pensaun baibain ne’ebé ba funsionárius, F-FDTL, veteranus no sira seluk tan.

Maibé, iha altura primeira lejizlatura nian iha krize nia laran, no bainhira atu besik ramata mandatu ansi demais entaun tau PV ba deputadu sira. Ne’eduni, deputadu sira maka sai fali tarjetu iha prosesu ne’e.

Branco hateten, lei ne’e prevémós fasilidades bar-barak, ne’eduni presiza atu haree didi’ak, tanbasé lae kria fali grupu balun hanesan espesiál fali iha nasaun ida ne’ebé ema hotu-hotu hakarak hodi tau fali deskripánsia entre grupu ida ho grupu seluk.

Nia hatután, sé lei ne’e halo alterasaun agora atu aplika ne’e ba mandatu ida agora mai ne’e (2016). Bainhira deputadu sira balun sai ona, ida ne’e maka sei hetan implementasaun hosi lei ne’e. Tan ne’e, atu halo alterasaun agora mós laiha nesesidade no ladun urjente ida. Ne’eduni, antes 2017 iha eleisoens lei ne’e tenke iha ona no agora daudaun iha ajenda lei barak maka atu aprova iha PN.

“Karik 2015 remata ne’e seidauk tama iha prioridade atu aprova. Maibé 2016 ne’e hakarak ka lakohi tenke sai ona prioridade ba aprovasaun lei PV, halo alterasaun tuir konsiénsia polítika, polítiku sira nianne’ebé reprezenta forsa polítika bankada haat (4) iha PN,” Branco esplika.

Entretantu, Vise Segundu Prezidenti Parlamentu Nasionál, Adérito Hugo hateten, nia lakohi ko’alia assuntu ne’e tanba ninia partidu rasik mós la’os manán maioria absoluta. “Ha’u nia partidu ne’e maioria simples. Kompromísiu ne’e halo antes tama ba eleisaun, sé CNRT manán maioria absoluta entaun ami bele halo mesak,” dehan Hugo ba Matadalán iha PN, foin lalais ne’e.

Tuir nia, CNRT la’os manán maioria absoluta, tanba ne’e nia mai tenke forma bloku liu-hosi obrigasaun konstitusionál. Tanba ne’e, kompromísiu eleitorál mós la’os halo depois de eleisaun, maibé antes tiha ona, tanba ne’e la’os kulpa CNRT nian.

Enkuantu, Dosente Siénsia Governamentais Universidade Nasionál Timor-Lorosa’e (UNTL), Matias Boavida hateten, reprezentante no ukun na’in sira laiha vontade polítika no hanoin de’it sira nia án rasik hodi fó todan ba primeira lejizlatura no haluha tiha kampaña ne’ebé sira halo liu hosi kompromísiu polítiku ba povu atu halo elimina ou revulga lei PV.

Ne’eduni, tuir nia, responsabilidade ne’e iha deputadu sira nia liman. Deputadu sira garantia de’it ba sira nia moris aban bainrua nian bainhira sai hosi membru deputadu. “Deputadus sira hanoin de’it katak, sé ha’u la reeleitu karik, pelumenus ha’u iha ona garantia moris ne’ebé ha’u iha. Sira garantia de’it ba aban bainrua nian sira iha ka lae, bele asesu ba rai liur, bele asesu hatama kareta hosi liur mai no seluk tan,” afirma dosente ne’e iha nia serbisu fatin, kampus Fakuldade Siénsia Sosiais UNTL, foin lalais ne’e.

Matias dehan, sé CNRT hanoin de’it katak todan ne’e tenki ba fila-fali iha primeira lejizlatura, entaunsira iha ne’ebá atu halo saida. Tuir loloos, CNRT maka hanoin kona ona atu hahú tanba sira nu’udar reprezentante povu nian hodi hatudu ba povu katak kompromísiu ne’ebé durante ne’e maka ida ne’e hodi labele tau todan tan ba primeira lejizlatura nian.

Matias Boavida informa, fukun ne’ebé halo hodi deputadu sira lakohi atu halo alterasaun ba lei PV ne’e rasik tanba benefísia no iha interesse ba sira. Sé sira muda agora maka sira sai, entaun sira atu halo lerek saida no sira la hetanosan.

Tuir nia, iha rejimentu internu, deputadu sira direitu atu hatama proposta de lei, maibé bankada sira hatama ka lae, CNRT hatama ona buat ruma ka lae. PD dehan hatama ona, FRETILIN dehan katak sira hatama uluk kedas iha AMP nian. Tanba ne’e, nia rasik la fiar katak deputadu sira atu altera ba lei refere. (Jon/Efrem)

Matadalan