PREVENE KONFLITU, PC HALO SOSIALIZASAUN

Xefi suku Comoro, munisipiu Dili, Eurico da Costa de Jesus hateten, sosializasaun Polisiamentu Comunitaria (PC) ho lideransa Suku sira ho objetivu atu prevene konflitus iha bairo-bairo sira iha kapital Dili.

“Sim kalan-kalan joventude sira iha suku Comoro iha aldeia balun sempre kria konfrontasaun, e agora dau-daun husi Konsellu Suku (KS) Comoro liu husi Konsellu Polisiamentu Comunitaria halo ona prevensaun ba aldeia hotu liu-liu husi kordenadores ne’ebe maka PC monta iha aldeia ida-idak, nune’e horiseik ami hamutuk ho PC halo ona prevensaun para atu iha sosialijasaun ida konaba polisiamentu komunitaria hodi prevene konflitus ne’ebe maka kalan-kalan sempre akontese,”Eurico de Jesus ba JN-Diário iha ninia knar fatin sede suku Comoro-Dili, Kinta (18/02/2016).

Nia esplika, aldeia ne’ebe maka kal-kalan sempre akontese problema ne’e maka iha parte Aimutin nia hanesan São Jose Aimetin Laran no São Miguel, maibe konaba problema ne’ebe rejulta joven kanek iha loron 3 ba kotuk ne’e ema husi bairu seluk maka mai halo problema, no problema refere tendensias arte marsiais ninian.

“Durante ne’e hanesan autoridade lokal ami halo prevensaun hanesan konvoka populasaun hotu-hotu liu husi aldeia sira ne’ebe maka afeitadu konflitus hanesan halo sosializasaun, avizus, no dialogu ba sira hotu atu halo prevensaun ba problema, e kuandu akontese konfrontasaun automatikamente sira tenki fo hatene polisia hodi halo atuasaun,”nia dehan.

Hatutan nia, konaba problema ne’ebe maka akontese hakanek joven ida iha parte Aimutin nian ne’e husi parte suku identifika ona vitima refere, maibe suspeitu ne’e maka susar atu identifika tanba ema ne’e mai husi suku seluk.

“Maibe agora dau-daun ita nia polisia kaer ona suspeitu hirak ne’e, e agora atu tama ona ba prosesu investigasaun, nune’e nei-neik ita sei identifika ema sira mai husi suku no bairu ne’ebe, no ita bele deskobre mos tanba saida maka problema ne’e akontese,”tenik nia.

Suku Comoro suku ida ne’ebe bo’ot no ho populasaun ne’ebe barak teb-tebes kompara ho suku seluk no hahu husi tinan 2004 kedas Comoro sai hanesan knuuk ba konflitu hotu-hotu, hanesan konflitu politiku, etnika, arte marsiais no konflitus ba rai, entaun ema aproveita oportunidade sira ne’e hodi hamosu konfrontasaun. ves

Jornal Nacional