PNTL KAPTURA RESPONSAVEL SERVEJA CROCODILE

Polisia Nasional Timor Leste (PNTL) liu husi Servisu Investigasaun Kriminal Nasional (SIKN) identifika Gudang Timor Global ilegalmente rai serveja marka Crocodile hamutuk kaixa 9.823 sein dokumentus, tanba ne’e polisia kaptura sidadaun China, Zon Xin nudar responsavel serveja Crocodile iha Timor Leste.

Polisia kaptura responsavel serveja Crocodile iha loron Kinta (18/02/2016) iha Gudang Timor Global Bairo-Pite, lori kedan responsavel serveja Crocodile ne’e ba detein iha sela polisia Caicoli-Dili hodi kumpri 72 oras.

Serveja marka Crocodile hamutuk kaixa 9.823 ne’e hatama husi kompañia Xineza. Tantu total serveja hamutuk dos 11.000, husi total refere dos 1.177 maka fa’an ona ba publiku kada dos ho presu $ 25 dolar amerikanu.

Hatan ba kazu refere Komandante Operasaun SIKN, Mouzinho T. Coreia deklara katak, polisia kaptura responsavel serveja Crocodile hodi ezekuta ordem Ministeriu Publiko (MP) nian.

“Mandadu detensaun sai ona nia tenke kumpri mandadu detensaun ne’e hodi hein prosesu ba Tribunal. Kompañia nia nain sei iha estrangeiru, maibe faze primeiru halo uluk prosesu ba detensaun, depois mak hein kompañia nia nain nune’e bele deskobre sé, sé maka iha kotuk hodi fasilita serveja illegal Crocodile ne’e tama mai TL,”afirma komandante operasaun SIKN, Mouzinho.

Realasiona kazu refere polisia servisu hamutuk ho Governu liu husi Ministeriu Comersiu Industria e Ambienti (MCIA) segel Gudang Timor Global hodi hein prosesu husi Tribunal.

“Serveja sira ne’e oras ne’e sei kontinua tau iha Gudang Timor Global iha Bairo-Pite no segel, hein desijaun,”hatutan komandante operasaun SIKN ne’e. Eus

Jornal Nacional