OMP-CNRT KONTINU EJIJI, HASAI IMIDIATA MEMBRU PD HUSI GOVERNU

Partidu Demokratiku (PD) desidi ona sira nian membru ne’ebé mak assume pasta Ministrus, Vise Ministru no Sekretariu Estadu sira, sei kontinua iha Governu ho independent, maibé Organizasaun Mulher Partidu (OMP) Conselho Nacional Reconstrução Timor (CNRT) kontinua ejiji atu hasai membru PD sira ne’e husi Governu.

Prezidenti OMP-CNRT Veneranda Lemos, deklara katak, la simu totalmente deklarasaun PD nian katak oferese nia membru na’in 6 nu’udar independenti iha Governu.

“Ami rezeita no la simu totalmente deklarasaun polítika Prezidenti interenu PD Adriano do Nascimento ne’ebé deklara ba média iha loron 4 fulan Maiu 2016 katak, PD oferese ema na’in 6 husi nia Kuadru Polítiku atu okupa nafatin kargu Polítika iha VI Governu Konstitusional nu’udar ema independent. Ami konsidera deklarasaun ne’e falta maturidade, honestidade no integridade polítika tamba membru partidu hirak ne’e kaer hela kargu importante iha estrutura máximu PD nian hanesan Prezidenti CPN, Adjuntu Sekretáriu Jeral Munisípiu Dili, Komisáriu Politiku no Xefi Departamentu sira Partidu Demokrátiku nian”, hateten Veneranda Lemos, liu husi konferensia imprensa iha Sede Nasional Partidu CNRT, Bairu dos Grilhos Dili, Sábadu (07/05/2016).

Venerando Lemos hatutan katak, pozisaun OMP-CNRT ne’e bazeia ba sentidu de Estadu no firmeza iha prinsípiu polítiku partidu nian ne’ebé kaer metin lealdade honestidade no integridade, no analiza klean ba konjuntura polítika atual iha Parlamentu Nasional no iha Governu ne’ebé mak dadaun, tanba ne’e OMP deklara rezeita totalmente deklarasaun husi Prezidenti Partidu Demokratiku (PD) nian.

Veneranda Lemos fundamenta katak, ho desizaun PD nian ne’ebé oferese membru na’in 6 ne’e, hatudu katak PD iha ambisaun polítika bo’ot liu fali dignidade polítika Partidu Demokratiku nian.

“Ami afirma katak desizaun PD hodi oferese membru na’in 6 nu’udar independenti hodi tuur nafatin iha VI Governu Konstitusionál ne’e hatudu katak, PD nia ambisaun polítika bo’ot liu fali dignidade polítika PD nian, ne’ebé Prezidenti Interenu PD Adriano do Nascimento temi lemo-lemo hodi atrai fali Prezidenti PD Saudosu La-Sama de Araújo nia liafuan murak no lulik ne’ebé fo hela mai ita hotu ba dala ikus katak “Ha’u Nia Dignidade La Aas Liu Dignidade Nasaun Nian”. Ida ne’e hatudu momos katak PD troka nia dignidade polítika ho ambisaun ba kargu nu’udar membru Governu”, Veneranda Lemos haklaken ho lia maka’as.

Aktual Sekretaria Estadu Mulher iha VI Governu konstitusionál ne’e afirma mós katak, membrus kuadru politiku nain 6 ne’ebé Prezidenti Interenu PD oferese ba membru Governu ho pozisaun independenti iha VI Governu kostitusional ne’e iha nafatin veinkulasaun partidaria forte, ne’e kontra opsaun husi karta partidu CNRT nian ho data 22 de Abril 2016.

Veneranda Lemos mós hateten katak, OMP konsidera deklarasaun Prezidenti Interinu PD ne’e, deklarasaun polítika baratu ne’ebé kuadru politiku Partidu Demokratiku halekar ou espalha iha públiku katak partidu CNRT presiza teb-tebes atu mantein membrus Partidu Demokratiku nian atu tuur nafatin iha kompozisaun VI Governu konstitusionál.

“Ba ida ne’e ami OMP-CNRT ho orgulhu apela ba PD katak partidu CNRT iha rekursus humanus sufisiente iha setor oi-oin atu asumi kargu iha Governu. Nu’udar Organizasaun masa Partidu ne’ebé konstitui forsa polítika partidu CNRT nian, OMP ho konfiansa tomak deklara katak Partidu CNRT iha kuadru polítiku ne’ebé mak prontu atu substitui ou troka membrus PD nia pozisaun iha VI Governu agora kedas”, dehan Veneranda Lemos.

Prezidenti OMP-CNRT ne’e mós fundamenta katak, ejiji ba Prezidenti Partidu CNRT Kay Rala Xanana Gusmão ho estrutura tomak konsellu politika nasional, konsellu diretiva nasionál partidu CNRT atu hasai imediatamente membrus PD husi VI Governu konstitusional hodi troka ho ema ne’ebé mak partidu iha konfiansa polítika, fiar iha sira nia kualidade no mós ho prinsípiu lealdade honestidade no integridade.

Ejijénsia hanesan mós hato’o ona husi Organizasaun Juventudi Partidu (OJP) CNRT iha semana kotuk, ne’ebé husu ba Primeiru Ministru (PM) Rui Maria Araújo atu hasai membru PD sira ne’ebé mak oras ne’e dadaun sei mantein hela iha Governu, hodi okupa kargu Ministrus, Vise Ministru no Sekretariu Estadu sira.nes

Jornal Nacional