PD LA PEÑORA DIGNIDADE BA POZISAUN

Membru Bankada Parlamentar PD, Deputadu Virgilio Hornay hateten, PD la peñora nia dignidade politika ba pozisaun relasiona ho ezijensia nebe hato’o husi Organizasaun Mulher Partidu (OMP) CNRT nebe husu atu hasai membru Partidu Demokratiku (PD) nebe deklara an ona hanesan independente.

“Hau hanoin PD la peñora nia dignidade politika ba pozisaun, nebe hau hanoin husik ba kontinua lao hanesan ne’e, PD nia hanoin maka ne’e oinsa buka atu kontribui nafatin maibe PD nia hanoin hakarak buka atu kontribui maka mai husi partidu seluk maka hola fali desisaun seluk, hau hanoin PD mos hanesan partidus politikus nia iha posisaun ba,” hateten Virgilho Hornay iha PN, Segunda (09/05/2016).

Nia hatutan, ida ne’e direitu Organizsaun Mulher Partidu CNRT nian atu koalia maibe iha politika PD mos iha posisaun.

“Hau hanoin PD buka nafatin kontribui katak tuir pedidu ne’e, ba la reprezenta partidu, ba hanesan individu maibe la halakon sira nia direitu, sira nia liberdade, sira nia responsabilidade iha partidu,” dehan nia.

Iha fatin hanesan Presidente husi bankada PD Deputada Maria Lourdes Besa hateten, ida ne’e asuntu inteernu CNRT nian PD laiha komentariu kona ida ne’e, laiha buat ida atu hatan saida maka PD deside ona ho responsabilidade tomak i konsensia tomak.

“Ejijensia CNRT nian ne’e ba CNRT nia laran, ami la iha buat ida atu koalia,” hateten Maria Lourdes Besa iha PN.

Nia hatutan Permeiru Ministru demite membru Governu, membru Governu sae, Permeiru Ministru la demite la sae.

Nia esplika tan katak PD toma posisaun ona ne’e publika ona no ida ne’e PD mantein, ejijensia CNRT nian ida ne’e problema CNRT nian laos PD nian. Dehan Besa. Nes

Jornal Nacional