Fen Ejije Salariu, La’en Simu Ho Pankada

Ho nervozu arguido JL (la’en) baku vitima OM (fen) to’o desmaia tanba ejije vensimentu la’en nian e atitude ida ne’e obriga arguido tenke ba hatan iha tribunal.

Tuir akuzasaun husi ministeriu publiku ne’ebe lee sai husi juis prezidente, katak besik fulan rua ona arguido JL la fo osan ba vitima OM, wainhira vitima husu kona ba salariu arguido sempre dehan “osan seiduak tama iha banku”.

Maibe, wainhira vitima ba iha arguido nia servisu fatin arguido nia kolega sira dehan ba vitima, katak arguido sempre deve nia osan.

Ho razoens hirak ne’e mak vitima husu ba arguido kona ba nia salariu, maibe arguido la hatan no baku dala ida iha kotuk laran, no dudu ba parede hodi vitima monu no desmaia.

Hafoin lee sai akuzasaun hirak ne’e, juis prezidente husu ba arguido atu fo nia deklarasaun ou hili atu nonok, maibe iha altura ne’eba arguido hili koalia hodi dehan ba tribunal katak, osan hirak ne’e arguido uza ba selu tusan tanba arguido konsege impresta osan iha kolega wainhira lakon joga karta.

“Hau lakohi dehan tanba hau tauk nia hirus, maibe hau baku tanba nia tuda kopu ba hau,” arguido deklara iha tribunal Dili.

Maibe arguido arepende ba hahalok ne’ebe mak nia halo, hodi promote ba tribunal katak iha future sei la komete tan aktu hanesan.

Iha fatin hanesan defensor publik ne’ebe halo defeza ba arguido, husu ba tribunal atu aplika pena ne’ebe kma’an, tanba arguido arepende ona nia kulpa no nia baku vitima tanba vitima tuda uluk kopu ba arguido, nudar mane sente nervozu, tanba ne’e mosu attitude ne’e.

Hafoin rona tiha deklarasaun husi arguido, juis prezidente fo pena suspensaun ba arguido.

The Dili Weekly