ESTATUA NICOLAU LOBATO NAKFERA

Kondisaun estatua Nicolau Lobato iha fatin istóriku Aiserimou, Postu Administrativu Aileu Villa, Munisípiu Aileu, agora dada’uk komesa nakfera no halis  atu monu ona.

Monumentu Nicolau Lobato ne’e, foin mak harii iha tinan 2014, maibé agora dada’uk estatua ne’e hanesan tiha ona tinan 20 resin.

Prezidenti Repúblika to’o iha Suku Aiserimou, iha oras tuku 14:00 Otl, hodi diálogu ho komunidade iha Suku Seloimalere ho Suku Aiserimou.

Komunidade iha Suku rua ne’e, antusiaismu tebes hodi forma iha estrada ibun basa liman haklalak hodi simu Xefi Estadu ne’e ho nia komitiva.

Bainhira Xefi Estadu ne’e hakat to’o odamatan Jardim Monumentu Nicolau Lobato nian, Taur Matan Ruak simu husi lia nain sira ho ferik katuas sira ne’ebé baku tambor hodi bidu akompaiña Taur Matan Ruak tama ba fatin diálogu iha jardim monumentu Nicolau Lobato nian.

Antes atu hakat to’o fatin diálogu, Xefi Estadu ne’e hakfodak tebes, tanba haree kondisaun estatua Monumentu Nicolau Lobato halis no nakfera ona.

Ho laran triste Taur Matan Ruak hateten ba Administrador no Xefi Suku Aiserimou katak, monumentu ne’e tenki hetan rehabilitasaun urjenti.

“Ha’u husu urjenti tenki hadi’a lalais estatua ne’e, tanba estatua ne’e harii seida’uk to’o tinan rua, maibé nakfera no halis dadauk ona, ita fakar osan saugati de’it, halo sasan sira ne’e laiha kualidade, estatua ne’e bele ba koa fali,” hatete Taur Matan Ruak bainhira haree direita estatua Nicolau Lobato ne’e, nia kondisaun, Segunda (18/07).

Xefi Estadu ne’e mos husu ba Xefi Suku sira no no Administrador sira iha Aileu atu tau matan no halo rekomendasaun lalais ba Governu atu hadia fatin refere, selae bele estraga.

Iha fatin hanesan, Xefi Suku Aiserimou, Ilidio Mau Felo mós hatete katak, estatua Nicolau Lobato ne’e, seida’uk to’o tina rua, maibé nia kondisaun ladik ona.

“Tanba ne’e, ami rekomenda ba Governu atu tau atensaun laalis ba estatua ne’e,” dehan Ilidio.cos

Jornal Nacional