Ministru Justisa hein katak majistradu portugés sira to'o "iha tempu badak"

Iha loron-kinta ne'e ministru Justisa, Ivo Valente hatudu otimista katak grupu ida ho majistradu portugés na'in lima ne'ebé sei kumpri knaar sira iha Timor-Leste, hanesan inspetór judisial sira no iha sentru formasaun jurídiku nian, bele to'o iha nasaun iha tempu badak.

"Ami seidauk iha loron loloos maibé ha'u hein katak sira bele to'o iha tempu badak. Projetu sei la'o hela", Ivo Valente hatete iha deklarasaun ba Lusa.

Tuir nia esplika katak autoridade timoroan sira haruka ona ba Portugal naran sira hosi majistradu portugés na'in rua ne'ebé maka hili ona hosi Konsellu Superior Majistratura Timor-Leste nian (hosi lista ida ne'ebé hato'o hosi Lisboa) hodi hala'o knaar sira inspetór nian iha Díli.

Funsaun sira ne'e hanesan importante iha momentu atual hodi permiti inísiu hosi prosesu promosaun ba juís sira hosi instánsia dahuluk ba Tribunal Rekursu, instituisaun ida ne'ebé hanesan paralizadu oituan tanba falta juís sira.

Aleinde majistradu na'in rua ne'e, sei ba Timor-Leste portugés na'in tolu seluk ne'ebé sei kaer funsaun sira iha Sentru Formasaun Jurídiku iha Díli ne'ebé reprezenta kontinuasaun hosi koperasaun bilateral Portugal nian iha área justisa nian.

Koperasaun ne'e afetadu maka'as iha tinan 2014 nia rohan ho orden espluzaun ne'ebé fó ba majistradu sira ne'ebé barak liu ema portugés ne'ebé kaer knaar iha Timor-Leste no hahú hosi tempu ne'ebá maka halo revizaun ba kuadru koperasaun hodi nune'e majistradu sira ne'ebé agora ba nasaun la kaer funsaun sira judisial ezekutivu nian.

Fatór burokrátiku sira, iha Timor-Leste no Portugal, atraza hela majistradu sira nia viajen, maibé kontinua hala'o projetu sira seluk hosi programa extensu hosi koperasaun iha área judisial nian.

SAPO TL ho Lusa – Foto: EPA@ Manuel de Almeida