Veteranu Oan Nain 218 Hetan Ona Bolsu Estudu

Dili, (ANTIL) – Hahú hosi tinan 2013 to’o 2016, Ministériu Edukasaun fo bolsu estudu ba veteranu sira no nia oan ne’ebé mak eskola iha rai laran no iha rai liur hamutuk 218.

Númeru benefisiariu sira, maioria eskola iha rai laran hanesan iha Universidade Nasionál Timor Lorosa’e (UNTL), Universidade Orientál Timor-Leste (UNITAL), Universidade Páz (UNPAZ), Institut of Buisness (IOB), Institutu Superior Cristal (ISC) no iha Indonezia.

“Benefisiariu sira iha rai liur hamutuk ema nain 17, nain 12 estuda iha grau lisensiatura, nain rua estuda iha masteradu no nain tolu estuda iha doutoramentu,” Kordenadór hosi Gabinete Kordenasaun ba Apoiu Estudante, Aquiles Salvador Guterres ba ANTIL iha Ministériu Edukasaun Vila-Verde, Sesta (23/9).

Tuir Kordenador, ministériu edukasaun fo subsidiu ba semestre ida-idak nian no sira uza subsidiu ba sira nia nesesidade eskola hanesan ba atividade kurikular ne’ebé mak suporta sira nia estudu, depois hetan fali semestre tuir mai, sira hatudu sira nia relatoriu hosi rezultadu akadémiku no sira nia valór sira tenke aprezenta fali mai no sira nia estatutu ne’e sei ativu hela ou lae pois ministériu prosesa fali semetre tuir mai nian.

Ba benefisiariu ida ne’ebé mak eskola iha rai laran sei simu US$ 900.00 ba tinan ida iha área lisensiatura, no sira ne’ebé estuda iha Indonezia hetan U$ 1800 ba tinan ida, grau ba masteradu nian, hetan subsidiu US$ 3,000.00 no doutoramentu ho subsidiu US$ 4,000.00.

Apoiu ba antigu kombatente libertasaun nasionál  nia oan sira ne’ebé mak hakarak kontinua hela sira nia estudu iha ensinu superiór sira bele iha rai laran no iha rai liur liu-liu ba veteranu sira nia oan hosi frente diplomatika, frente klandestina no frente armada.

‘’Sira halo proposta ida mai ministériu edukasaun no sira tenke anexa dokumentu komprovativu sira ne’ebé mak dehan katak sira ne’e estudante universitariu ou rejistu ona iha universidade sira iha rai laran no mós ih arai liur’’ Tuir Kordenadór

Nune’e mós universidae sira ne’e tenke akredita ona, sira mós tenke aprezenta dokumentu sira hanesan dokumentu sidadania nian hanesan Timor oan ne’ebé estuda iha rai laran no iha rai liur.

Hanesan mós estuda iha rai liur tenke ho pasaporte, vistu tenke moris no estuda iha rai laran mos tenke iha dokumentu estadu nian hanesan, bilete identidade, sertidaun RDTL no seluk tan.

Atu komprova katak sira nia estatutu hanesan antigu kombatente libertasaun nasionál, tenke aprezenta fisa veteranu nian ne’ebé mak deklara katak sira ne’e hanesan estatutu antigu kombatentes.

Dokumentu sira ne’e emite hosi komisaun omenajen, wainhira sira submete sira nia proposta mai ministériu edukasaun, entaun ministériu rasik sei avalia, mas molok atu husu aprovasaun hosi superiór sira, ministériu edukasaun sei halo Crros chek no husu konfirmasaun ba entidade sira relevante.

Hafoin konfirma tiha, ami husu aprovasaun ba superior sira atu bele konsede subsidiu eskolar nian ba sira. (Jornalista: Zezito Silva / Editor: Gantry Meilana)

Foto: Kordenadór hosi Gabinete Kordenasaun ba Apoiu Estudante, Aquiles Salvador Guterres