GRÁFICA NACIONAL MAK IMPRIME MATERIA EZAME NASIONAL

Kompañia Gráfica Nacional (GN) Lda,  manan tender husi Comissão Nacional de Aprovisionamento (CNA), hodi  halo  imprime ba materia ezame nasional tinan 2016 nian, hahú  husi Ensinu Báziku to’o Sekundáriu.

“Foin dadauk  ne’e ita loke konkursu públiku ba Kompañia hira maka tuir, maibe CNA maka   halo, depois  iha momentu  ne’eba  prosesu aprovizionamentu la’o hotu ona,  depois konkursu mós la’o normal, Gráfica Nacional mós kompete, bainhira Gráfica Nacional kompete  ho Kompañia sel-seluk,  tuir  kriteriu  regras aprovizionamentu  Prokuramen nian, Gráfica Nacional  maka priense rekejitus sira ne’e hotu, entaun  Gráfica Nacional maka kona projetu ne’e  hodi halo servisu,” Koordenador Unidade   Kuríkulu  Nasional  Ministériu Edukasaun, Fernando Mouzinho Gama, ba  Jornal Nacional Diário, iha edifisiu Gráfica Nacional, Liquintai Dili, Kuarta (21/09).

Nia hatutan, projetu  ne’ebé atu halo impresaun ba materia ezame nasional  nian nomos diploma  ka ijasah ba estudante  sira finalista  ba tinan 2016 nian.

 “Orsamentu ne’ebé aloka ba  projetu ne’e, momentu ha’u nia proposta ne’e, osan ne’e kuaze trezentus mil dolar,  maibe agora  ha’u lá hatene sira hatama kuotasaun hira husi  kompañia ida  ne’e ha’u lá hatene, maibe orsamentu   ne’ebé maka  preparadu ne’e trezentos mil,  proposta  ne’ebé maka ha’u halo ba  Finansas atu halo prosesu ba tenderizasaun ne’e,”dehan Fernando Mouzinho Gama.

Nia dehan tan,  tuir kontratu ne’ebé maka iha projetu  imprime ba meteria sira  ne’e sei finaliza  iha 20 de Outobru tinan 2016  ne’e.

“Ita sei halo distribuisaun ba eskola sira hodi halo ezame nasional,”dehan Fernando Mouzinho Gama.

Materia ne’ebé maka Gráfica Nacional sei halo imprime ne’e, nia dehan,  hahú husi Ensinu Báziku terseiru siklu, liu-liu ba nono ano nian, nomos  ba decimo segundo ano ba Sekundáriu jeral nian tekniku profisional nian.

Iha parte seluk  Jeneral Manajer Gráfica Nacional, Herlambang Miary, hatete, materia ezame  ne’ebé maka Gráfica Nacional imprime ne’e kuaze dua juta halaman. “Kona-ba lembar ne’e ha’u lá hatene, mais ou menus dua juta halaman,  porvolta container ida,”dehan  Herlambang Miary.

Kona-ba kualidade tinta ba material sira ne’e?  Herlambang Miary hatan, ne’e iha kualidade.

“Iha periodu liu ba labele kompara ho tempu dadauk  ne’e,  agora  buat  hotu  avansu. Tanba ne’e ha’u garante materia ezame sira ne’e sei  produs ho tinta ne’ebé maka kualidade diak liu,”dehan nia.avi   

Jornal Nacional