CCI-TL Ermera Husu SEJD Hapara Obra Estadiu Gleno

GLENO, (ANTIL) – Hare’e ba obra Estadiu Gleno iha Autoridade Munisipal Ermera ne’ebe kontinua laiha progressu ba nia konstrusaun, Camara Comersiu Industria Timor-Leste (CCI-TL) Ermera husu ba Sekretaria Estadu Joventude no Desportu (SEJD) atu hapara hapara kontratu ba kompana Maferdi ne’ebe kaer obra ne’e.

Razaun prinsipal CCI-TL husu SEJD hapara obra ba estadiu refere, tamba kompana Maferdi ne’ebe manan ba projetu ne’e to’o ohin loron laiha mudansa ba nia konstrusaun, inkuantu obra estadiu munisipiu seluk besik remata ona hodi entrega ba governu.

“Hanesan Timoroan, Ermera oan husu ba SEJD, se hadomi rai ne’e tenki hapara ona kontratu kompana Maferdi, tamba labele halo ona, agora deit laiha atividade servisu,” Prezidenti CCI-TL Ermera, Luis Alves Tilman dehan ba ANTIL, iha Gleno, Kinta (22/09/2016).

Ho konstrusaun ba obra estadiu nian ne’ebe kontinua laiha mudansa no atividade servisu nian, hatudu katak kompana refere laiha duni intensaun diak no kapasidade hodi kontinua halao projetu ne’e.

“Diak liu SEJD fo deit ona ba kompana seluk ne’ebe iha kapasidade, uluk fo ona prolonga tempu fulan 10, maibe ohin loron nia laiha mudansa nafatin, ami sei kaer hela lia fuan sekretariu estadu katak nia komitmentu bo’ot atu halo black list ba kompana ne’e kuandu laiha mudansa, povu ermera hein hela nia komitmentu,” Luis hateten.

Projetu obra Estadiu Gleno ne’e ho naran Rehabilitasaun Estadiu Futebol no Konstrusaun foun tribun Estadiu Gleno – Ermera ho nia kontratu numeru ICB / 0106/SEJD-2014, valor projetu nian ho montante US$ 1169,672.63. Ne’ebe kompanha Maferdi Unipessoal Lda mak kaer ho durasaun tempu fo deit fulan 10 hahu 10 Junu 2015.

Iha vizita ba estadiu refere, laiha traballador ida mak mosu iha estadiu refere.

Iha tinan hanesan, SEJD mos loke projetu ba kontrusaun foun Estadiu Munisipal Manatuto no Maliana, no Rehabilitasaun Estadiu Futebol no Konstrusaun foun tribun Estadiu Baucau. (Jornalista: Gantry Meilana)

Foto: Kondisaun Estadiu Gleno -Ermera ne'ebe laiha atividade obra ba projetu ne'e, Kinta (22/09/2016). Foto: ANTIL / Gantry Meilana