BNCTL Kontinua Aumenta Kapasidade

DILI, (ANTIL) – Kliente iha Banku Nasionál Comérsiu Timor-Leste mak foti kredit hamutuk 17,000 resin no kliente ida rai osan hamutuk 250,000 resin iha teritóriu tomak. Dadus kliente ne’e husi primeiru BNCTL harii to’o 31 Agustu 2016.

“Tanba BNCTL banku estadu, nia tenke hamrik iha liña oin para atu fó asesu bankária ne’ebé luan to’o área rurál, alende BNCTL iha rede boot iha teritóriu tomak no sei kontinua halo esforsu atu bele fó servisu di’ak ba kliente sira”, Prezidente Konsellu Administrasaun BNCTL, Brígido de Sousa ba ANTIL iha nia k’nar fatin, Segunda, (3/10).

BNCTL nia objetivu la’ós atu aumenta lukru maibé oinsá atu aumenta kapasidade, atu bele hetan klienta barak liu-tan. Nia hatutan, BNCTL úniku banku loke nia sukursál iha minisípiu 13 hotu no halo mos operasaun ho banku movel to’o distritu atu halo pagamentu ba funsionáriu, veteranu no seluk tan. Fasilita mós ema sira selu kréditu la-presiza to’o banku, bele liu de’it banku movel.

“Tinan oin BNCTL se harii sede foun iha Obrigadu Barack, dezeñu halo ona hein atu aprezenta no bele halo tenderizasaun ona”, Brígido informa.

Nia aumenta, fulan hira tan sede BNCTL ida agora ne’e sei halo reabilitasaun, edifísiu BNCTL iha munisípiu 13 sei halo foun hotu tanba, kliente sira mai sena malu, ne’e duni atu halo konstrusaun foun iha munisípiu sira hotu atu fó espasu ba kliente sira. (jornalista: Julia Chatarina; editora: Rita Almeida)

Foto: Prezidente Konselu Administrasaun BNCTL, Brígido de Sousa intrevista ho ANTIL iha nia k’nar fatin Segunda (3/10). (Foto ANTIL: Julia Chatarina)