AS. PONTA LESTE SAI KAMPIAUN BA SUPER TAÇA

Jogu Liga Futebol Amadora (LFA) Timor Leste Super Taça époka 2015/2016, ekipa AS. Ponta Leste sai kampiaun hodi halakon AD. SLB nu’udar nia adversariu ne’ebé hala’o iha Sesta (25/11) foin lalais.

Kontra atake entre ekipa rua refere, hetan diriji husi pessoal árbitu Zelasio da Silva aktual xefe árbitrazen iha Federasaun Futebol de Timor Leste.

Hahú lian árbitu ba jogu primeira parte, kampiaun liga époka 2015/2016 AD. SLB halo kedas atake máximu ba grande area (perigu) AS. Ponta Leste, no ikus mai hetan nia rezultadu pozitivu, tanba estrela João Pedro ho jersey 10, marka golu ba dahuluk ba rede Ponta Leste, liu husi suta bola maka’as no lakonsege hetan guarda diak husi baliza.

Ho golu husi estrela João Pedro iha menutu 12, lori nia ekipa lidera lidera menutu primeiru. Maske nune’e ekipa AS. Ponta Leste núdar kampiaun Taça 12 de Novembru étapa-IV tinan 2016, ne’e mos lakohi husi oportunidade. Tanba ne’e jogadores ekipa ne’ebé hetan treinu husi nia treinador Eduardo Pereira, halo kedas nia esforsu hodi halo atake ba area AD. SLB.

Ikus mai ekipa AS. Ponta Leste, liu husi nia jogador Shota Tokunaga (estranjeiru-Japaun) ho jersey 10, konsege marka golu responde iha menutu 26, wainhira aproveita bola falta, liur husi garis 16 (liña 16), jogador estranjeiru refere suta bola maka’as no lakonsege salva ho diak husi baliza, tanba ne’e ho golu refere halo AS. Ponta Leste empata 1-1 kontra AD. SLB no la iha mudansa score to’o remata jogu primeira parte.

Hafoin rekreiu durante menutu 15 no kontinua fali jogu segunda parte nian, ekipa rua refere hala’o hikas kontra atake ho ritmu ne’ebé áas, liu husi esforsu jogadores kada ekipa ne’ebé mak aplika iha kampu laran. AS. Ponta Leste hanesan klubu ne’ebé reprezenta knúk (fatin) ba gerileirus sira iha reziaun Ponta Leste, nia treinador Eduardo halo kedas mudansa ba ekipa, liu husi substituisaun jogadores iha linña avansadu, dada sai Shota Tokunaga (Japaun) no truka fali nia kompatriota Silveiro Garcia ho jersey 27.

Esforsu husi treinador AS. Ponta Leste, Eduardo Pereira refere la faila no fó rezultadu possitivu tebes, tanba ne’e avansadu Silveiro konsege marka golu ba daruak iha menutu 88, wainhira jogador ho jersey 27 ne’e aproveita bola moris hodi suta maka’as no lakonsege salva ho diak husi baliza AD. SLB.

Tanba ne’e mak ekipa rua refere kompleta nia tempu jogu durante menutu 90+1, klubu jigante husi Lorosa’e, AS. Ponta Leste núdar kampiaun ba jogu Super Taça, ho score golu 2-1.

Hafoin remata, entrevista jornalista sira ho treinador AS. Ponta Leste, Eduardo Pereira hateten, sente kontente tebes tanba bele ganña kampiaun ba Super Taça, maske nune’e iha fulan hirak liu ba mos “ami iha oportunidade atu sai kampiaun liga, maibe lakonsege,”.

Nia hatutan liu tan katak, kampiaun ba Super Tasa ida ne’e hanesan tarjetu boot ida, no sira lakohi atu faila tan, tenke taka ho kampiaun no ikus mai sai realidade, tanba buat hotu nia rezultadu tuir mehi.

“Hau hanoin konabá jogador sira kuaze disiplina no buat hotu-hotu tuir hau nia orientasaun ne’ebé mak fó, no ikus mai fó susseco no kontente mai ekipa no fans-fans AS. Ponta Leste,” afirma Nia.

Iha sorin seluk, treinador AD. SLB, Kim Shun Him hateten, derota kontra ekipa AS. Ponta Leste tanba SLB nia jogadores ekipa kuaze ho idade ki’ik.

“Hau rekuiñese katak, derota ida ne’e ami simu tanba failansu husi jogadores mak kuaze ho idade ki’ik no ladauk iha mental no fiziku, maske jogadores ho tatiku no speed ne’ebé masimu.” rekuinese treinador, Mr. Kim. Ito

Jornal Nacional