F-FDTL TENKI REFORSA PNTL ATUA GAM

Haree ba  problema entre Grupu Arte Marsiais (GAM), iha kapital Dili hodi rezulta ema mate, kanek no uma hetan estragus nune’e fo impaktu  ba instabilidade mak observador Politika Nasional husi Universidade Nasional Timor Lorosa’e (UNTL), Camilo Ximenes Almeida, husu Falintil Forsa Defeza Timor-Leste atu reforsa Polisia Nasional Timor-Leste (PNTL) atu atua ba krime hirak ne’e.

Camilo dehan, problema entre GAM iha Dili laran, halo povu  nia movimentasaun loron no kalan la seguru.

“Falintil Forsa Defeza Timor Leste (F-FDTL), atu reforsa PNTL  hodi  hala’o operasaun  ba Grupu Artemarisiais (GAM) iha kapital Dili,  iha tempu kalan nune’e bele garante seguransa no estabilidade   ba povu sira. Situasaun ida  ne’ebé mak besik ona eleisaun, ha’u hanoin F-FDTL tenki aumenta tan operasaun la’o ba mai iha tempu kalan,  so loron  ne’e Polisia deit,”esplika Camilo Ximenes Almeida, ba jornalista iha Kampus UNTL Antigu, Caicoli, Dili, Tersa (29/11).

 Nia dehan, la’os  iha tempu funu deit mak halo operasaun,  maibe  iha situasaun ida hanesan ne’e ba atu asegura seguransa  no estabilidade presiza patrulha  ne’ebé mak rutina atu nune’e  povu  ne’ebé mak la’o   ne’e ho liberdade.

Nune’e mós, Camilo Ximenes Almeida, tristi oituan ho servisu autoridade lokal sira, tanba dala ruma problema  akontese  iha Suku laran no Aldeia entre joven sira, maibe  autoridade sira labele  buka atu hakalma.

Nune’e nia sujere ba Ministério Estatal tenki fo orientasaun maka’as ba autoridade lokal sira atu  kria seguransa  ne’ebé  mak extra, seguransa   ne’e la’os PNTL deit, maibe autoridade sira presiza fo atensaun ba ninia povu sira atu mantein orden públiku.

Alende   ne’e  Camilo Ximenes Almeida, husu   ba PNTL atu atua  mós ema sira  ne’ebé mak sunu paixon    iha  tempu  kalan. Tanba tuir nia, kuandu  ema tiru paixon  iha tempu kalan  fo impaktu mós ba ema seluk  ninia deskansa.

“Los duni menggangu estabilidade. Ha’u  hanoin tenki atua duni.  Ne’e  duni PNTL tenki hasai sira ninia patrulhamentu extra atu bele atua buat sira hanesan  ne’e,”hatete Camilo Ximenes Almeida.

Nune’e mós nia dehan, dala ruma bo’ot balun (lider politiku) mak  fasilita  fugetis ba labarik balun iha Becora  hodi sunu paixon tarutu hanesan kainaun.

“Ha’u hela  iha Becora labarik sira sempre dehan katak, iha ministru balun  iha osan,  kuandu  iha 31 Dezembru sira  ne’e petasan (fugetis)  ne’ebé mak tarutu hanesan kainaun  ne’ebé mak  ita rona. Ne’ebé dala ruma  ita husu se mak fo Ministru sira mak faslita hela buat sira hanesa  ne’e,”hateten Camilo Ximenes Almeida.

Nia fo hanoin  hikas  katak, ho problema  GAM iha kapital Dili nomós iha teritoriu Timor laran tomak,  IV Governu  ne’ebé mak lidera husi Kay Rala Xanana Gusmão,  desidi no hasai rezolusaun Governu hodi taka tiha GAM, hanesan Kmanek Oan Rai Klaran (KORK), Persaudaran Setia Hati (PSHT), Kera Sakti, atu labele  hala’o sira ninia treinamentu. Maibe iha realidade mak GAM sira kontinua hala’o sira ninia aktividade treinamentu, PNTL tenki atua.

Iha parte seluk antes Komandante Jeral PNTL, Komisariu Julio Hornay hatete,  atu rezolusaun ne’e forte ka la forte, ne’e iha Tribunal mak hatene, Polisia nia knaar mak oinsa implementa rezolusaun ne’ebé Governu fo sai.

“Ami labele dehan, rezolusaun Governu nian la forte, ami ezekuta deit rezolusaun ne’ebé mak fo sai ona”hatete Julio Hornay, iha Kuartel PNTL Munisipiu Lautem foin lalais ne’e.avi

Jornal Nacional