LABELE UZA PATRIMÓNIU ESTADU BA AKTIVIDADE POLITIKU

Prezidenti Comissão Nacional de Eleições (CNE), Alcino Barrís hateten, Lei proibi Partidus Politiku sira uza patrimoniu Estadu hodi ba hala’o aktividades politikus.

“CNE iha kompetensia atu garante tratamentu de igualidade, signifika katak, labele iha parte balun uza fasilidade Estadu nian no balun la’e. Lei dehan katak, labele uza patrimoniu Estadu nian ba hala’o aktividades politikus ka ba fali interese partidarias nian, tamba lei proibi,”informa Prezidenti CNE, Alcino Baris ba jornalista sira foin lalais iha salaun enkontru CNE, hodi responde ba prisaun preventiva ne’ebé CAC harii oras ne’e dadaun iha Palapaço Dili hodi sulan funsionariu ruma ne’ebé karik uza patrimoniu Estadu ba aktividade politika. Depois de hala’o enkontru ho NGO Belun.

Nia hatutan, se lei proibe, se mak pratika asaun ida ne’e automatikamente sei sujeita kedas ba prosesu ruma, tantu disiplinar ka kriminal, tamba ne’e iha razaun CAC koloka situasaun ida ne’e.

“Bele dehan katak CNE mos orgaun ida ne’ebé fo atensaun maka’as ba interesadu sira ka publiku para labele uza bens Estadu nian ba interese partidu politiku. To’o agora kazu balun la’o hela iha Tribunal tamba balun utiliza sala patrimoniu Estadu nian ba interese partidus politikus,”afirma Prezidenti CNE.

Iha fatin hanesan, Diretor NGO Belun, Luis Ximenes mos afirma katak, patrimoniu ne’ebé Estadu nian nunka bele uza fali ba iha interese partidu hodi ba hala’o kampaina ruma.

“Ha’u hanoin iha lei no regulamentu, tantu husi PDHJ, CAC no sosiedade sivil lamenta tebes ho hahalok hanesan ne’e, tamba nunka atu uza fali patrimoniu Estadu ba iha partidu politiku ka ba fali kampania no grupu. Ne’e mos parte ida ami sei kontinua tau matan hodi halo parseria ho PDHJ para bele haree hamutuk kestaun ida ne’e,”dehan Diretor NGO Belun, depois de asina akordu ho CNE hodi monitoriza eleisaun jeral ne’ebé besik dadauk ona.ías

Jornal Nacional