Kafe TL Seidauk Koesidu iha Merkado Internasional

DILI - Andrew Helzel, hanesan Coffe Trade and Policy Adviser hosi Estadu Unidus Amérika, deklara katak, Timor-Leste hanesan nasaun ne’ebé la’ós deit potensiál ba mina no gas, maibé iha mós produtu  agrikula seluk hanesan kafé.

Andrew dehan, maske durante ne’e iha kompaña barak maka sosa kafé povu agrikultór nian hodi esporta ba merkadu internasionál sira hanesan Estadu Unidus Amérika, Japaun, Indonézia, Austrália no mós nasaun seluk tan, maibé produtu lokál hosi TL ne’e rasik kuñesidu iha merkadu railiur nian.

“Timor-Leste nia kafé ema barak seidauk koñese diak, inklui mós nasaun bo’ot sira ne’ebé maka  kategória merkadu internasionál mós seidauk koñese diak kafé Tim’or,”dehan Andrew iha nia diskursu bainhira aprezenta kona-ba kafé iha Konferénsia Internasionál Kafé nian ne’ebé maka hala’o iha Sentru Konvensaun Dili, Sesta (02/12).

Konferénsia internasionál ne’ebé maka realiza hosi Ministériu Agrikultura no Peskas (MAP) ho tema ‘Importánsia Kafé No Dezenvolvimentu Ekonomia Sustentavel’ ne’e, Andrew Helzel afrima katak, maske TL viziñu ho nasaun rua hanesan Austrália no Indonézia, maibe populasaun hosi nasaun rua ne’e rasik seidauk koñese didiak kafé TL nian.

Tan ne’e Andrew, husu atu Governu no komunidade agrikultura sira tenke servisu hamutuk hodi bele foti konesimentu populasaun sira iha merkadu internasionál atu bele koñese diak liután kafé TL, hodi bele hasa’e mós kualidade no produsaun iha railaran rasik.

Tanba bainhira laiha servisu hamutuk maka iha futuru maske ho nia produsaun bo’ot, maibé nia kualidade mosu iha merkadu internasionál hodi fó mós impaktu ba iha exportasaun.

“Ne’ebé ita bele hasa’e produtividade no kualidade iha merkadu internasionál, bele hasa’e diak liután produtividade no mós bele kria mós kualidade diak hodi bele esportadór sira bele kontinua fa’an ita nia kafé iha merkadu nune’e bele fó rezultadu ho folin diak no mós bele fó motivasaun ba agrikultura sira bele hasa’e produtividade,”katak Andrew.

Nia mós husu ba governu atu servisu hamutuk mós ho grupu agrikultura sira nune’e bele hasae diak liu tan kuinesimentu agrikultura sira nune’e bele hadia diak liu tan produsaun nomós produsaun ne’e rasik iha Timor Leste.

Hosi kafé TL ne’ebé maka durante ne’e halo exportasaun ba merkadu internasionál nian, tuir Andrew katak, komunidade internasional sira kuaze koñese kafé hosi TL iha pursentu 0,11deit, maske durante ne’e kafé Timór halo ona esportasaun liu ba nasaun 50 resin iha mundu, tan ne’e presiza nafatin atu oinsa bele eleva kafé TL nia imajen iha mundu internasionál maske kualidade diak iha merkadu internasionál.(jxy)

Timor Post

LEE MOS TIMOR POST