Universidade Coimbra sei trata arkivu ne'ebé hanesan Timor nia "istória" iha vídeo

Universidade Coimbra sei kolabora iha prezervasaun no dinamizasaun hosi espóliu ne'ebé jornalista Max Stahl rekolla iha Timor-Leste hamutuk oras 5.000 resin, "istória nasaun nian iha vídeo", informa hosi instituisaun iha loron-kuarta ne'e.

Arkivu ho oras rihun lima resin, ne'ebé besik "dijitalizadu hotu", agora sei iha kolaborasaun hosi Universidade Coimbra (UC) iha tratamentu, indexasaun no katalogasaun hosi espóliu tomak ne'ebé rekolla hosi Max Stahl, jornalista inglés ne'ebé filma no divulga masakre Santa Cruz, iha 1991, bainhira ezérsitu indonéziu hahú tiru hasoru populasaun, oho ema na'in 271 iha fatin no na'in 127 seluk ne'ebé mate iha loron sira seluk hafoin masakre.

Inisiativu mosu hafoin protokolu ida entre UC, institutu Max Stahl ho Universidade Timor-Leste, informa iha loron-kuarta ne'e hosi visi-reitor instituisaun Coimbra nian Joaquim Ramos de Carvalho, ne'ebé ko'alia durante aprezentasaun públiku hosi UC nian inisiativu "Timor: Imajen sira no Liafuan sira ne'ebé muda ona mundu".

Iha arkivu, sei iha imajen sira ne'ebé rekolla iha tempu pré-independénsia nian, hanesan kazu hosi masakre Santa Cruz no hosi entrevista sira ba guerilleiru timoroan sira, imajen sira hosi referendu no hosi prosesu ne'ebé lori ba independénsia Timor-Leste nian no iha períudu hafoin independénsia, ho vídeu sira ne'ebé la'ós de'it ba prosesu polítiku maibé mós kona-ba timoroan nia moris loron-loron, rejista festa sira, biodiversidade nasaun nian no asaun no prátika kultural sira, esplika hosi Joaquim Ramos de Carvalho.

Hahú hosi arkivu, UC hakarak kria "kuantidade ida hosi produtu sira ne'ebé la hanesan hodi serbisu no bazeia iha arkivu", hodi garanti katak maioria hosi material sira ne'e bele sai disponivel ba públiku.

"Iha material pedagójiku no didátiku barak" ne'ebé bele halo hahú hosi espóliu, hatutan hosi visi-reitor UC nian hodi refere katak multiplikasaun hosi "utilizasaun" posivel ba espóliu sei permiti atu bele sai hanesan "arkivu ativu ida".

Espóliu, iha nia hanoin, "iha potensial maka'as ida", hakarak atu universidade mós dinamiza nia divulgasaun la'ós de'it iha komunidade akadémiku hosi nasaun rua ne'e, "maibé mós ba mundu" hasoru interese "mundial" kona-ba prosesu kontrusaun hosi nasaun timoroan nian.

"Timor: Imajen sira no Liafuan sira ne'ebé muda ona mundu" hanesan inisiativu ida hosi Universidade Coimbra ne'ebé organiza, to'o loron 16, eventu oioin dedika ba tema, hodi hanoin hikas tinan 25 masakre Santa Cruz nian no tinan 20 ba atribuisaun Nobel Dame nian ba Ximenes Belo ho José Ramos-Horta.

SAPO TL ho Lusa