Funsionáriu 117 Sei Destaka Nafatin iha RTTL, EP

DILI (ANTIL)- Funsionáriu Públiku Rádiu Televizaun Timor-Leste,EP (RTTL,EP) bainhira Governu fó opsaun atu hili Empreza Públiku ka mantein funsionáriu públiku, nune’e rezultadu ne’e iha katak ema na’in 117 hili sai funsionáriu públiku, 39 mak deside sei hala’o knaar iha empreza públiku no 33 laiha opsaun atu hili ba empreza públiku ou funsionáriu públiku.

Liuhusi sorumutuk entre Prezidente Komisaun Funsaun Públiku, Faustino Cardoso, Serkretáriu Estadu Komunikasaun Sosiál (SeKoms), Nélio Isaac Sarmento, Diretór Jerál Prezidénsia Konsellu Ministru, Victor Maia, no Prezidente Konsellu Administrativu RTTL, EP, Milena Abrantes, iha edifísiu Komisaun Funsaun Públiku, Kinta (26/1/2017) katak funsionáriu 117 ne’ebé hili sai funsionáriu públiku sei destaka nafatin iha RTTL, EP.

Prezidente Funsaun Públiku (FP), Faustino Cardoso iha enkontru ne’e hatete, kona-ba desizaun destakamentu funsionáriu sira ne’e, FP presiza lista ikus liu husi RTTL,EP tanba relatóriu ne’ebé hato’o seidauk iha desizaun ruma husi Konsellu Administrativu RTTL,EP nian atu simu funsionáriu hira nune’e FP presiza iha klareza no desizaun formál mezmu iha enkontru ne’e mensiona ona ema na’in hira mak sei hala’o knaar iha RTTL,EP.

Entretantu husi lista ne’ebé bazeia ba kestionáriu liuhusi formuláriu ne’ebé fahe, SEKOMS hatete, to’o ona tempu ba rezultadu RTTL,EP nian hodi haree loos kona-ba estatutu funsionáriu nian, oinsá sira ne’ebé hili EP, funsionáriu públiku ne’ebé hakarak halo destakamentu iha RTTL,EP no kumpri regra RTTL nian ka FP no funsionáriu ne’ebé iha formuláriu lahili opsaun signifika prienxe formuláriu maibé lahatete atu ba RTTL,EP ka funsionáriu públiku maibé iha de’it opsaun ida katak funsionáriu públiku.

Nélio Isaac informa ba Prezidente Funsaun Públiku katak orsamaentu ba funsionáriu RTTL asegura hela. “Ami asegura, momentu ne’e ami hakarak tau orsamentu saláriu no vensimentu RTTL nian husi totál funsionáriu sira hotu iha Sekretáriu Estadu Komunikasaun nian, maibé momentu ne’e opsaun seidauk iha no Governu nia desizaun polítika katak órgaun sira independente ne’e fó orsamentu ba sira rasik atu jere, entaun ami konsidera katak saláriu no vensimentu ne’e ita tau iha transferénsia públika SEKOMS nian para bainhira iha opsaun hili hotu funsionáriu traballadór karik ita lapreokupa”.

Maibé, bainhira opsaun ne’e iha, funsionáriu balun hakarak mantein funsionáriu públiku, osan transfrénsia públika ne’e labele transfere tanba tenke koordena ho atuál lista funsionáriu públiku no Ministériu Finansa atu koloka fali ba SeKoms ka Prezidénsia Konsellu Ministru atu orsamentu asegura no saláriu la’o nafatin.

Enkuantu, funsionáriu 33 ne’ebé lahili opsaun sei halo destakamentu ba iha SEKOMS kuaze ema na’in-12 tanba iha departamentu Audiovizuál ne’ebé presiza ema nomós rádiu Metro FM no seluk sei fila mai FP.

Milena Abrantes hatutan, funsionáriu 117 ne’ebé sei destaka iha RTTL,EP ne’e númeru ida ne’ebé boot maibé maibé RTTL,EP tenke hala’o tuir empreza nia lala’ok.

“Ami sei fó espasu destaka funsionáriu 117 pessoas ne’ebé sei kontinua servisu nafatin hanesan baibain. Parte seluk hanesan empreza ida, ami sei hasoru nafatin mentalidade ne’ebé ladevia mantein maibé konsellu iha kompromisu atu asegura regra ne’ebé empreza iha,” Milena dehan. (Jornalista: Maria Auxiliadora / Editor: Gantry Meilana)

Foto: sorumutuk entre Prezidente Komisaun Funsaun Públiku, Faustino Cardoso, Serkretáriu Estadu Komunikasaun Sosiál, Nélio Isaac Sarmento no Prezidente Konsellu Administrativu RTTL, EP, Milena Abrantes, iha edifísiu Komisaun Funsaun Públiku, Kinta (26/1/2017)