sexta-feira, 27 de janeiro de 2017

Vise-MF Justifika Saláriu Tarde ba Funsionáriu

Dili, (ANTIL) – Vise-Ministru Finansa (Vise-MF), Helder  Lopes hateten katak saláriu ba funsionáriu hotu ne’ebé tarde tanba tinan ne’e, governu deside tenke halo ajustamentu iha sistema liu hosi ajustamentu salariál ba funsionáriu sira ne’ebé iha rejime jerál no dadaun ne’e, munisípiu sira mós iha orsamentu propriu, entaun hakarak ajusta iha sistema tenke haree hodi koloka osan lolos atu sira simu.

“Ezemplu, staf Ministériu Agrikultura ne’ebé servisu iha munisípiu, signifika ita tenke halo ajustamentu sistema atu nia bele simu osan propriu hosi orsamentu munisípiu nian,”  dehan Vise-MF ba jornalista sira iha Ministériu Finansa (MF), Kuarta, (25/01/2017).

Tuir Vise-MF, ajustamentu mak han tempu oituan, maibé dadaun ne’e prosesamentu osan komesa haruka ona ba banku sentrál, hein katak hahú aban bele tama ona ba konta bankaria ba funsionáriu ida-idak nian.

Hafoin ida ne’e, fulan sira tuir mai, saláriu hahú normál liu hosi esforsu ne’ebé Ministériu Finansa iha, atu osan bele tama lalais ba konta ema ida-idak nian.

MF nia papél atu halo pagamentu ba funsionáriu hotu iha fulan ida ne’e. labele fiar ba karta balun ne’ebé fo sai hosi média sosiál katak Janeiru ne’e funsionáriu la simu osan.

“Karta ne’ebé sira tau iha média social, ne’e problema interna sira nian, la’os MF nian,” nia dehan. (Jornalista: Zezito Silva / Editor: Gantry Meilana)

Foto: Vise-ministu Finansa, Helder Lopes

Sem comentários: