sábado, 14 de janeiro de 2017

MAP iha Estimasaun atu Produz Fini 3

DILI (ANTIL) - Ministériu Agrikultura no Peska (MAP) iha tinan 2017 iha nia estimasaun ba produsaun fini hanesan fundasaun, sertifikadu no komersiál nian.

Diretór Nasionál Agrikultura no Ortikultura, MAP, Amaro Ximenes ba ANTIL iha Comoro, Kinta (12/1/2017) informa katak iha tinan ida ne’e MAP bele prodús fini fundasaun to’o tonelada ida ka rua.

“Fini sertifikadu tuir ami-nia planu atu prodús to’o tonelada 15 ba hare nune’e mós batar, depois prodús fini komersiál ne’ebé dadus tama hotu ona katak iha 2017 prioridade sei prodús tonelada 300,” Amaro dehan.

Husi fini tonelada 300 ne’e  fahe ba kategoria tolu hanesan: batar sei prodús 199 mil kilógrama, haree sei prodús 222 kilógrama no fore-rai sei prodús 10.000 kilógrama.

Amaro esplika katak, batar ne’ebé atu kuda ne’e iha área ho nia luan 1.900 hektare no tuir estimasaun sei prodús to’o 19.800 kilógrama. Ba haree sei kuda iha área ho nia luan área 11.400 hektare no nia estimasaun sei produz 22.800 kilógrama no Fore-rai sei kuda iha luan área 107 hektare no estimasaun sei produz 107.000 kilógrama, ne’e sai trajetu ba tinan 2017 nian.

Jornalista: Maria Auxiliadora / Editór: Alberto Alves

Foto: Diretór Nasionál Agrikultura, Ortikultura no Extensaun, Amaro Ximenes.

Sem comentários: