Xanana Gusmao “Garante” Kargu Prezidenti Republika ba Lu-Olo

GLENO (ANTIL) – Prezidenti Partidu Congresso Nasional Rekontrusaun Timorense (CNRT), Kay Rala Xanana Gusmao iha kampanye abertura kandidatura prezidenti republika, Francisco “Lu-Olo” Guterres “garantia” ona kargu prezidenti republika ba kandidatura numeru rua ne’e hodi tuur iha Palasiu Aitarak Laran nu’udar Prezidenti Republika periodu 2017-2022.

Hamutuk ho Partidu CNRT, Xanana Gusmao deklara Lu-Olo sei manan iha primeira ronde.

“Lu-Olo sei manan primeira ronde, laiha tan segunda ronde,” hakilar Xanana Gusmao wainhira hato’o nia intervensaun iha kampana kandidatura hosi Partidu FRETILIN ne’e, Sexta (03/03/2017), iha Gleno, Autoridade Munisipal Ermera.

Tamba ne’e laos deit CNRT ho FRETILIN, husu mos ba militante CASDT, UNDERTIM, PEP no povu tomak atu vota Lu-Olo iha loron eleisaun prezidensial nian ne’ebe sei realiza iha 20 marsu 2017.

Nune’e mos Sekretariu Jeral Partidu FRETILIN, Mari Alkatiri iha nia intervensaun husu ba povu tomak hodi hili kandidatura Lu-Olo nune’e bele sai prezidenti republika ba povu tomak.

“Ita hotu sei vota ba Lu-Olo hodi lori nia ba Palasiu Aitarak Laran nudar prezidenti republika,” hakilar Mari Alkatiri.

Nia esplika katak, kandidatura Lu-Olo hili Ermera, tuir Mari Alkatiri nia pensamentu atu hatudu deit sinal Timor ema ida deit, laiha loro-monu laiha loro-sa’e.

Saudozu Nino Conis Santana maski mai hosi rai Tutuala (Lautem), maibe iha luta ba libertasaun rai ne’e nian, nia mate iha Ermera tamba deit defende prinsipiu luta ba ukun rasik an.

Ho istoria hirak ne’e, Marii Alkatiri dehan Lu-Olo ohin hahu loke prosesu foun ida no istoria foun ida atu hatudu ba Timoroan tomak katak demokrasia laos atu fahe ema, maibe demokrasia atu fo ba Timoroan tomak iha liberdade atu hanoin no liberdade atu halibur.

“Agora ita tenki hamutuk para lori rai ne’e ba oin. Lu-Olo sai simbolu ba ida ne’e,” Mari Alkatiri haklaken lia unidade nasional.

Hodi konvida Timoroan tomak, espesial povu Ermera atu hamutuk dala ida tan iha tempu ida ne’e hodi lori Lu-Olo ba Palasiu Aitarak Laran nu’udar prezidenti republika ba periodu 2017-2022 tamba Lu-Olo sei loke prosesu foun ida no istoria foun ba futuru Timor-Leste iha ambitu unidade nasional.

Iha nia intervensaun ne’e mos, sekretariu jeral Partidu FRETILIN ne’e mos hato’o lia fuan deskulpa, “Atu hahu’u hau lori FRETILIN nia naran husu kedan deskulpa tamb abuat ruma lao ladun diak iha organizasaun ida ne’e”.

Alende ida ne’e, lori partidu FRETILIN nia naran, CNRT, UNDERTIM, CASDT nia naran Alkatiri fo obrigado ba partisipante kampana tomak ne’ebe fo ona nia tempu atu halibur malu iha kampana dahuluk kandidatura Lu-Olo nian. (Jornalista: Manuel Pinto / Editor: Gantry Meilana)