António Kalohan Konsidera Sai Prezidenti Repúblika La´ós Oportunidade

LOSPALOS (ANTIL)—Kandidatu Prezidenti Repúblika periodu 2017-2022, António da Conceição “Kalohan” konsidera katak prezidenti repúblika la´ós hanesan oportunidade ida ba nia maibé hakarak hola responsabilidade nasaun nian hodi halo reprezentasaun ba ema hotu-hotu iha Timor.

“Ha´u hakarak sai reprezentasaun polítika ba jerasaun foun sira no ba partidu polítiku sira hotu,” Kalohan hato´o asuntu ne´e iha nia abertura kampaña kandidau prezidenti repúblika periodu 2017-2022 iha Kampu Futeból Postu Administrativu Lospalos, Munisípiu Lautém, Sesta (3/3).

Nia informa, nia mai la´ós atu haketak timoroan maibé atu halibur timoroan sira, hametin unidade nasionál, haboot no hametin soberania nasionál nomós atu hatutan fundadór nasaun sira nia mehi.

“Ha´u hakarak atu fó garantia ida ne´e ba Aman nasaun sira hanesan Maun Xanana, Maun Marí no Maun Ramos Horta katak ita jerasaun foun maske ita nia otas sei nurak no laiha esperiénsia ne´ebé maka boot liu hanesan Maun sira, maibé responsabilidade nu´udar timoroan kontinua defende soberania Timor-Leste,” nia esplika.

“Ita ukun án tiha ona maibé seidauk kompletu tanba sei iha problema ne´ebé ita hasoru hela maka fronteira marítima. Ida ne´e la´ós problema partidu ida nian no la´ós Aman sira nian de´it maibé problema ida ne´e ita hotu-hotu ninian. Tanba ne´e maka ha´u hamriik hanesan kandidatu atu garantia ida ne´e ba sira (Aman fundadór nasaun), fó konfiansa ida ne´e ba sira hodi dehan katak ha´u sei hatutan saida maka Maun sira preokupa hela,” Kalohan salienta.

Nia afirma, prepara jerasaun foun la´ós buat hotu-hotu prepara tiha ona iha bandeiza laran depois entrega ba jerasaun foun sira. Tuir nia katak poder labele simu de´it hanesan prezenti. Poder ba ukun tenkiser ba konkista, tenkiser ba halo no buka rasik hodi bele hetan. Bainhira ba buka rasik atu hetan, nia tenik, maka depois kaer poder ne´e hodi senti duni katak ha´u tenkiser responsabilidade ba poder ida ne´ebé maka povu fó tiha ona ba ha´u.

Nia hateten, ninia komprimísiu prinsipál ida maka sei promove diálogu nasionál entre instituisaun órgaun soberania no promove unidade nasionál entre timoroan sira. “Ha´u nia vizaun maka Timor ne´e ba timoroan hotu-hotu, defende rikusoin ba timoroan sira hotu no sai advogadu ba populasaun sira ne´ebé maka laiha lian,” atuál Sekretáriu Jerál Partidu Demokrátiku ne´e esklarese.

Kampaña ba loron da-uluk ne´e hahú iha tuku 13:00-15:00. Partisipa iha kampaña ne´e maka hanesan Prezidenti Partidu Demokrátiku (PD), Mariano Assanami Sabibo ho nia estrutura, Sekretáriu Jerál Partidu KHUNTO ho nia estrutura no militante sira, reprezentante partidu PDN, PUDD, PLP, Frenti-Mudança nomós apoiante Kalohan rihun ida resin. Kampaña daruak nia sei hala´o iha Baucau, Sábadu aban. (Jornalista: Xisto Freitas/Alberto Alves)

Foto: Kandidatu Prezidenti Repúblika, António Kalohan halo orasaun (orasi) iha nia abertura kampaña iha Lospalos. Foto ANTIL/Xisto Freitas