DILI: Tempu udan la’os de’it lori buat di’ak,
maibé bele provoka mós buat at balun, liliu dezastre hanesan inundasaun no rai
halai. Tan ne’e, Ministériu Solidariedade Sosial (MSS) husu ba
komunidade sira ne’ebé hela iha area risku ba dezastre atu sees an.
Diresaun Nasionál Jestaun Risku
Dezastre (DNGRD)- Ministériu Solidariedade Sosiál (MSS) identifika fatin tolu
iha area Bekora, Taibessi, no Bairo-Pite enfrenta no risku ba dezastre
naturais.
Xefe Departamentu
Emerjensia-DNGRD, Albino Nicolau Freitas informa, iha loron rua nia laran,
24-25 Dezembru, nia parte simu informasaun kazu dezastre naturais iha fatin
balun.
Iha area Bekora, nia informa, iha
uma-kain ida mak bee tama nia uma, maibé la grave. Iha area Taibessi iha
uma-kain rua mak hetan ameasa ba dezastre rai halai, no iha Bairo-Pite hetan
ameasa hanesan.
Hafoin simu informasaun, nia
dehan, ekipa husi Sentru Solidaridade Sosiál Munisipiu Dili ba direitamente
hodi halo observa no iha loron hirak ne’e sei fó apoiu emerjensia ba komunidade
sira ne’ebé hetan risku ba dezastre.
Nia ekipa, Xefe Departamentu ne’e
hatutan, fó hatene ba komunidade ne’ebé iha risku hetan dezestre atu bele sees
husi fatin ne’e.
“MSS bele fó apoiu maibé sira mós
tenke sees husi fatin ne’e,” deklara nia.
Ba preparasaun MSS nian hodi
atende kazu dezastre, nia hatete, MSS prepara atu evakua komunidade ne’ebé
hetan afeita no apoiu emerjensia hanesan nesesidade báziku sira.
“Dezastre ne’e estraga hahan no
mós la’os aihan, ne’ebé ita prepara foos, lona no seluk tan hodi bele halo
intrevensaun dahuluk bainhira mosu dezastre,” katak nia.
Cristina Ximenes | Independente
Sem comentários:
Enviar um comentário