sexta-feira, 8 de dezembro de 2017

Semana rua laiha plenária, BOAMP krítika PPN

Semana rua ona, atividade iha Parlamentu Nasional (PN) paradu tanba Prezidenti Parlamentu Nasional (PPN), Aniceto Guterres, hapara atividade plenária hodi diskuti asuntu nasaun nian. Tamba ne’e, Bloku Opozisaun Aliansa Maioria Parlamentar (BOAMP) krítika maneira polítika ne’ebé PPN trasa.

Evidensia hatudu katak, iha Segunda no Tersa semana ne’e mós, atividade plenária iha parlamentu nasional laiha, tanba Prezidenti Parlamentu Nasional no bloku koligasaun la marka prezensa.

Ho situasaun ne’e, Bloku Opozisaun Aliansa Maioria Parlamentar (BOAMP) la kontenti, no konsidera Prezidenti Parlamentu Nasional viola ona rejimentu PN.

Xefi bankada PLP, Fidelis Magalhães, hateten, tuir rejimentu Parlamentu Nasional hateten klaru katak, Segunda no Tersa tenki iha atividade plenária.


 “Rejimentu mós hateten katak, bele hapara atividades iha Parlamentu, bainhira iha apoiu husi maioria iha Parlamentu, maibé kuandu laiha apoiu, tanba saida mak tenki hapara atividades plenária,” katak Fidelis Magalhães ba jornalista sira iha PN, Tersa (05/12).

Nia haktuir, semana ne’e laiha atividade plenária ne’e, kabe ba públiku atu interpreta no kompriende, tanba saida mak plenária iha PN paradu.

“Ami hotu mai iha ne’e, atu priense rekejitu plenária ne’e, iha parte ida ita dehan, krize institusional, maibé iha parte seluk ita rasik komete krize institusional, ida ne’e labele. Se ita honestu lolos karik, ita hotu iha dever atu asegura funsionamentu ne’e,” katak Fidelis.

Nia mós rekoñese katak, iha prosesu balu ne’ebé iha razaun atu PN adia nia andamentu, maibé ida ne’e tenki iha aprovasaun husi plenária, no hetan apoiu husi maoria Parlamentar, la’os maioria mak tenki submete fali ba minoria.

“Bloku Koligasaun lakohi mai plenária, para depois justifika ba públiku katak, iha krize institusional,” katak Fidelis.

Nune’e mós, Xefi bankada KHUNTO, Luis Roberto da Silva, hateten, bazeia ba rejimentu PN, Segunda ho Tersa tenki iha plenária.

“Maibé semana ida ne’e laiha plenária, ida ne’e ita viola rejimentu Parlamentu Nasional nian,” katak Luis Roberto da Silva.

Tuir KHUNTO nia hatene, bankada Koligasaun la marka prezensa iha plenária, tanba bankada opozisaun halo ona rekursu ida ba PPN relasiona ho OR, mósaun sensura ba VII Governu, no karta destituisaun ba PPN.

Alen ne’e, Xefi bankada FRETILIN, Francisco Branco, hateten, tuir regras normal iha Parlamentu Nasional durante tinan 15 nia laran ne’e, kuandu proposta Orsamentu Jeral Estadu ka Orsamentu Retifikativu tama iha PN, atividades hotu kanseladu.

“Ho nune’e mak, Prezidenti Parlamentu Nasional kaer normas ida ne’e, no sei ajenda mósaun sensura no buat sira seluk iha tempu ikus mai. Karta destituisaun ba Prezidenti Parlamentu Nasional ne’e inventa de’it hodi hateten katak, Prezidenti Parlamentu Nasional la hala’o ona nia kna’ar hanesan Prezidenti Parlamentu Nasional, tanba de’it la ajenda pedidu sira ne’ebé opozisaun hato’o,” tenik Branco. cos

GMN | Grupo Media Nacional

Sem comentários: