Ativista portugés promove konstrusaun eskola sira iha Timor-Leste

Ativista ba kauza timoroan iha Estadus Unidus, João Crisóstomo, buka daudaun tulun hodi harii eskola sira iha área sira iha foho ne'ebé maka afastadu liu iha Timor-Leste, ida dahuluk sei inaugura iha fulan-Janeiru ka fulan-Fevereiru iha tinan oinmai.

Liutiha tinan 15 hafoin independénsia, emigrante portugés ne'ebé nunka hapara kauza hosi autodeterminasaun Timor-Leste nian iha komunidade portugeza iha Estadus Unidus, vizita ona ba dala uluk Timor-Leste, iha fulan-Maiu, tinan ne'e, no haree katak iha foho sira, iha área ne'ebé afastadu liu iha teritóriu timoroan, laiha eskola ba labarik sira.

Tanba ne'e, nia desidi fó ánimu ba projetu konstrusaun - hahú hosi Rui Chamusco, portugés ida seluk, ne'ebé agora hanesan nia parseiru iha inisiativu ne'e - hosi eskola ida iha fatin sira ne'e, hanesan iha Manati-Boibau, iha leste nasaun nian, ne'ebé iha de'it labarik na'in tolu ne'ebé maka konsege vaga iha eskola ne'ebé besik sira nia hela fatin ho viajen oras tolu hosi povoasaun.

"No problema hanesan jeral, iha labarik barak ne'ebé laiha asesu ba ensinu, nune'e ha'u hanoin: dahuluk, ami sei harii ida ne'e no hafoin ne'e ami tenki halo asaun hanesan iha foho sira ne'ebé presiza", nia hatete ba Lusa.

Hodi tulun projetu, nia hasoru malu ho primeiru-ministru timoroan no husu mós apoiu hosi Vatikanu, ne'ebé iha fulan-Agostu hasoru malu ho sekretáriu Estadu, kardeal Pietro Parolin ne'ebé, iha fulan-Novembru, hakerek ona karta ida hodi felisita inisiativu, hodi hatete ba nia katak sei iha orasaun hosi papa Francisco no husik ba nia sujestaun ida.

"Ha'u sujere atu estabelese kontaktu ho bispu sira ne'ebé nia dioseze sira sei simu eskola foun sira, hodi nune'e imi nia projetu bele hetan kordenasaun ho sira ne'ebé maka halo tiha ona no, nune'e, hodi bele koresponde ho di'ak ba nesesidade sira hosi komunidade sira ne'ebé kiak liu no ne'ebé maka ema haluha", hakerek hosi kardeal, hodi agradese ba nia "preokupasaun no empeñu".

Kona-ba angariasaun osan sira ne'ebé maka presiza hodi avansa projetu, João Crisóstomo hatete katak loke ona iha Estadus Unidus konta ida ne'ebé ema sira bele halo donativu sira, no, iha Portugal, Rui Chamusco halo mós asaun hanesan hodi subliña katak despeza sira manutensaun nian sira maka selu.

"Bainhira ema ida fó dolar 100, dolar 100 ne'e sei haruka iha totalidade ba Timor-Leste, hodi harii eskola ida, la deskonta buat ida", nia hatete.

"Iha Estadus Unidus, Family Carvalho Foundation, organizasaun filantrópiku ida lahó finalidade lukrativu ne'ebé maka ha'u husu ona ajuda ba projetu ne'e, loke ona konta ida ho finalidade exkluzivu iha Chase, iha Mineola, Nova Iorke", nia hatete no hatutan katak "iha Portugal, donativu sira tenki halo ba konta Asosiasaun Astil, loke iha Caixa Geral de Depósitos”.

Nia hatete ba Lusa katak laiha númeru definitivu ida hosi eskola ne'ebé nia konstrusaun sei hanoin hela hodi refere katak projetu ne'e foin maka hahú.

"Sei halo neineik. Ideal maka barak, maibé depende hosi apoiu ne'ebé ha'u hetan to'o agora... Mehi, ita hotu iha barak, maibé mai ita haree hirak maka bele konkretiza", nia hatete.

SAPO TL ho Lusa