Fundu Minarai Iha Trimestre Outubru-Dezembru Hamutuk Billaun U$16,80

DILI, (TATOLI) – Fundu Minarai Timor-Leste nian iha trimestre ikus nian iha períodu 1 outubru to’o 31 dezembru 2017 hamutuk billaun U$16,80, dehan Vise Governadór Banku Sentrál Timor-Leste (BSTL), Venancio Alves Maria.

Iha trimestre antes ne’ebé mak termina iha 30 setembru 2017 kapitál petrolíferu hamutuk billaun U$16,69.

“Reseita sira ne’ebé mai husi royalty no taxa iha trimestre ida ne’e (outubru to’o dezembru) millaun $94,88”, katak Venancio iha edifísiu BSTL, ohin.

Totál reseita husi númeru iha leten ne’e kompostu husi kontribuisaun kontribuinte sira ba fundu hamutuk millaun $44,92 no pagamentu royalty simu husi Autoridade Nasionál Petróleu millaun $49,96.

Osan kontadu líkidu ne’ebé sai husi fundu durante trimestre ne’e hamutuk millaun $346,88 kompostu husi millaun $343,80 transfere ba orsamentu Estadu no millaun $3,08 kobre kustu jestaun nian.

Rendimentu husi investimentu fundu nian hamutuk millaun $365,23 kompostu husi kupaun no jurus ne’ebé simu mak millaun $77,04, mudansa iha valór merkadu nian millaun $269,47 no movimentu cambiais mak millaun $18,72 iha trimestre ne’e.

“Rendimentu em termos retornu iha trimestre ida ne’e 2,17% ba nia portofóliu no kompara ho nia referénsia 2,04%”.

Venancio hatutan sobre informasaun finanseiru iha balansu billaun $16,8 iha 2017 kompara ho dezembru 2016 ne’e billaun $15.84.

“Deklarasaun lukru no lakon iha trimestre ida ne’e ita hetan millaun $360,71 husi janeiru to’o dezembru 2017 hamutuk billaun $1.6”.

“Durante istória fundu Petróleu dezde inísiu mai to’o agora 2017 mak ita hetan retornu ida di’ak liu períodu hotu-hotu. Pelu menus bele kobre uitoan reseita ida husi ita fa’an mina ne’e tun fali, reseita investimentu mak sa’e mas ne’e la garantia katak iha futuru tenke nafatin hanesan ne’e, merkadu iha tinan ida ne’e nia laran iha ita-nia afavor ne’ebé barak liu mak kontribui husi evolusaun merkadu”.

Jornalista: Maria Auxiliadora | Editora: Rita Almeida

Imajen: Banco Central de Timor-Leste (BCTL) realiza konferénsia de-imprensa bá lansamentu Relatóriu Trimestrál Fundu Mina-Rai bá dala 48, bá periódu ne’ebé termina iha loron 30 Juñu 2017, iha sala reuniaun BCTL. Foto/BSTL.

Notísia ne’ebé ralasiona:

http://www.tatoli.tl/2017/11/fundu-minarai-iha-trimestre-ikus-hamutuk-billaun-u1669/

BSTL Iha Outubru-Dezembru Transfere Ona Fundu millaun $343,80 ba OJE Nian  

Vise Governadór Banku Sentrál Timor-Leste (BSTL), Venancio Alves Maria, hatete iha trimestre outubru to’o dezembru 2017 BSTL halo ona transferénsia millaun $343,80 husi Fundu ba Orsamentu Jerál Estadu nian.

“Iha outubru ita transfere millaun 60, novembru ita transfere no dezembru ita transfere millaun 223.8. Totál millaun 343.8 iha trimestre ida ne’e, iha trimestre sira anteriór ne’e ita transfere millaun $735”.

Nune’e totál transferénsia iha tinan fiskál 2017 to’o fin trimestre ida ne’e millaun $1.078 mak tansfere ona ba OJE nian.

“Ne’e kobre hotu ona ida ne’ebé aprova tiha ona iha Parlamentu Nasionál”.