Ministériu Finansa timoroan fó
sai programa boot ida hosi rekrutamentu tékniku sira no espesialista sira ba
Autoridade Tributária ho Autoridade Aduaneiru foun sira, elementu sentral rua
hosi programa Reforma Fiskal ne'ebé hala'o daudaun iha nasaun.
"Hanesan tempu hosi jerasaun
foun sira hodi partisipa no kontribui ba ita nia dezenvolvimentu, uza formasaun
sira ne'ebé simu iha universidade sira ne'ebé sira frekuenta. Lori koñesimentu
modernu sira hodi bele muda ita nia ekonomia", hatete hosi Fernanda Borges,
responsável hosi programa Reforma Fiskal, ba Lusa iha loron-tersa ne'e.
Rekrutamentu, ne'ebé halo hela
iha munisípiu tomak Timor-Leste nian no iha estranjeiru, hanesan hakat foun ida
iha programa boot hosi reforma fiskal ne'ebe hakarak "aumenta reseita
sira, diversifika ekonomia no iha aumentu ekonómiku nesesáriu hodi bele konsege
dezenvolvimentu iha nasaun".
Polítika transversal, iha
dezenvolvimentu besik tinan rua nia laran, inklui aprovasaun hosi kuadru
lejislativu foun ida ne'ebé permiti ona kria autoridade foun rua no adopta
kódigu aduaneiru ida, ne'ebé agora sei aplika.
"Hosi kuadru legal nia
laran, iha nesesidade hodi rekruta timoroan sira ho formasaun iha área oioin:
kontabilidade, ekonomia, informátika, komunikasaun. Ha'u fiar katak iha rekursu
humanu ba área sira ne'e. Durante tinan 17 nia laran ami forma ema sira iha
área oioin, ami fó ona bolsa estudu, barak maka fila ona no buka hela
serbisu", nia esplika.
Efeitu ida haree ona maka hamenus
tempu hosi prosesamentu kontentor sira nian ne'ebé to'o iha portu Díli, ne'ebé
lentidaun halo ona empreza sira transporte nian aplika taxa adisional ba
Timor-Leste.
Fernanda Borges haree katak
implementasaun hosi sistema informátiku foun hamenus ona tempu ne'e, maibé
subliña katak sei iha falla balun iha rekursu humanu nian, iha estrutura sira
Estadu nian no mós iha empreza privadu sira hosi área.
"Ami implementa ona ida hodi
fasilita prosesu no hamenus tempu hosi kontentor ida iha portu, maibé kontentor
sira to'o no "broker sira" seidauk bele serbisu ho sistema hodi hasai
lalais. Dalaruma, ami iha kontentor sira lahó dokumentu sira hodi prenxe",
nia hatete.
Hodi hasoru kestaun ne'e,
programa hosi reforma fiskal inklui planu ida formasaun no apoiu ba ajente
privadu sira ne'ebé envolvidu iha importasaun ho esportasaun, no presiza atu empreza
sira "rekruta tan ema ho kapasidade iha área sira ne'e", nia refere.
Kestaun importante seluk, ne'ebé
liuhosi dekretu ka lei ida, maka aplikasaun hosi pauta aduaneiru foun, ne'ebé
sei fasilita klasifikasaun hosi sasán importadu sira, sei ajuda Estadu hodi
hetan liután reseita sira.
Fernanda Borges destaka mós
importánsia hodi hametin serbisu "iha fronteira terestre sira ne'ebé tama
kontentor barak no ne'ebé ladún iha kontrolu".
Aspetu ida ho impaktu boot maka
introdusaun hosi impostu ho folin akresentadu (IVA), ne'ebé proposta ba diploma
ne'e iha ona Governu nia liman laran hodi bele estuda.
Estimativu maka bainhira hahú
hala'o IVA bele reprezenta reseita anual adisional sira hamutuk dolar millaun
110 (besik euro millaun 90 resin), hatete hosi Fernanda Borges.
SAPO TL ho Lusa
Sem comentários:
Enviar um comentário