Iha loron-kuarta ne'e, opozisaun
timoroan insisti ona katak Parlamentu funsiona hela no asaun ne'ebé falta maka
"inisiativu ho vontade di'ak" hosi prezidente hodi hala'o sesaun
plenáriu sira ne'ebé maka seidauk hala'o iha tinan ne'e.
"Parlamentu Nasional
funsiona hela, komisaun sira funsiona hela, ami iha númeru nesesáriu hosi
funsionamentu no deliberasaun no tanba ne'e laiha razaun hodi sujere katak
Parlamentu la funsiona. Asaun úniku ne'ebé falta iha Parlamentu maka inisiativu
no vontade di'ak hosi prezidente Parlamentu", hatete hosi Fidelis
Magalhães, xefe hosi bankada Partidu Libertasaun Popular (PLP).
"Laiha krizi institusional,
komisaun sira funsiona hela. Ema úniku ne'ebé karik lakohi funsiona iha momentu
ne'e daudaun maka señór prezidente Parlamentu nian, ne'ebé lakohi hala'o knaar
hosi nia mandatu tuir mandatu hosi Parlamentu Nasional nian", nia afirma.
Deputadu ko'alia ba jornalista
sira hafoin enkontru badak ida ne'ebé delegasaun hosi bankada tolu opozisaun
nian - Congresso Nacional da Reconstrução Timorense (CNRT), PLP ho Kmanek
Haburas Unidade Nacional Timor Oan (KHUNTO) - halo ho Prezidente Timor-Leste.
Fidelis Magalhães insisti ona
katak hanesan reuniaun ida ne'ebé hakarak serve de'it hodi "husik votu
felisidade nian, saúde ho susesu ba tinan foun ne'e ba Prezidente Repúblika no
Estadu timoroan tomak".
"Ami aproveita mós hodi
repete ami nia respeitu ba Prezidente hodi hala'o nia majistratura", nia
esplika.
Nia insisti ona katak iha kestaun
ida ne'ebé la hanesan maka funsionamentu hosi Parlamentu no "hanesan importante
hodi la kahur asuntu rua".
Timor-Leste, iha fulan barak nia
laran, hasoru hela períudu polítika ne'ebé laloos ho opozisaun, maioria iha
Parlamentu Nasional, xumba programa Governu nian no proposta ida hosi Orsamentu
Retifikativu, no aprezenta ona proposta ida sensura nian ba ezekutivu no
proposta ida hodi hatún prezidente parlamentu nian.
Iha tinan 2017 nia rohan,
Parlamentu laiha sesaun plenáriu durante fulan ida ho prezidente Aniceto
Guterres defende katak ne'e akontese tanba iha debate ba Orsamentu
Retifikativu, ne'ebé la liu. Tinan ne'e seidauk iha sesaun plenáriu ruma, maski
rejimentu defini katak hala'o baibain iha loron-segunda ho loron-tersa sira.
Iha semana ne'e, Aniceto Guterres
Lopes hatete katak "ezijénsia hosi opozisaun, hodi hala'o reuniaun
plenáriu, iha loron sira 15 no 16 Janeiru 2018, labele halo" no konfirma
ona katak plenáriu sira fila de'it iha loron 31 Janeiru. Iha de'it loron ne'e
maka sei debate proposta sensura hasoru Governu ne'ebé opozisaun aprezenta iha
loron 18 Novembru liubá.
Justifikasaun ba adiamentu
plenáriu sira, tuir komunikadu, maka tanba "hafoin notifikasaun ba Governu
kona-ba proposta sensura, no iha konsekuénsia hosi konsertasaun entre Governu
ho Parlamentu Nasional", ezekutivu hato'o "realizasaun debate ba
proposta sensura ne'e iha loron 31 Janeiru 2018".
Nune'e, "Parlamentu Nasional
sei hala'o reuniaun plenáriu estraordináriu, hodi halo debate ba asuntu
referidu, no nia durasaun labele liu loron tolu", hatutan hosi komunikadu.
Proposta hodi hatún prezidente
Parlamentu Nasional nian, aprezenta mós hosi opozisaun, "labele ajenda
tanba sei hein hela desizaun ikus hosi Tribunal Rekursu, hodi respeita direitu
hosi rezisténsia no defeza lejítimu no direitu hosi asesu ba tribunal sira
ne'ebé maka garanti iha Konstituisaun ba sidadaun tomak".
Fidelis Magalhães hatete katak
hanesan importante avansa "ho funsionamentu normal hosi parlamentu",
laiha "razaun ruma hodi adia tan inisiativu sira ne'ebé maka seidauk
trata".
Ba deputadu hanesan importante
hatene, agora bainhira nasaun tama iha duodésimu dezde loron 01 Janeiru,
kona-ba argumentu sira ne'ebé aprezenta iha debate hosi retifikativu
"hanesan verdade ka hanesan de'it halo ba objetivu polítiku".
"Ami eziji plenáriu ida iha
Parlamentu hodi diskuti no haree, fó sai ba públiku, sé maka utiliza loloos
interese povu nian hodi hetan finalidade diskursizu ka polítika no haree loloos
sé maka iha interese ne'e iha fuan nia laran", nia hatete.
SAPO TL ho Lusa
Sem comentários:
Enviar um comentário