domingo, 25 de fevereiro de 2018

Kampaña Golput iha Medsos ne’e Krime


DILI: Grupu estudante balun foin lalais lansa informasaun ba públiku liu husi média sosiál (medsos) hodi konvense ema labele vota (Golongan putih-golput) iha eleisaun antesipada.

Ne’e duni, Polisia Nasionál Timor-Leste (PNTL) sei buka tuir ema sira ne’ebé halo propaganda polítika ne’e, tanba Konstituisaun obriga sidadaun hotu-hotu atu halo resenseamentu eleitorál.

Vise-Prezidente Comissão Naçionál das Eleisões (CNE), Duarte Tilman Soares hateten, estudante ne’ebé halo kampaña gloput ka lakohi vota, ne’e konstituisaun hateten, resenseamentu ne’e obrigatoriu. Votasaun maka konxiénsia sívika sidadania ida-idak nian.

“Labele hateten fali atu konvense ema seluk atu labele ba vota. Ida ne’e kuandu konvense ema seluk atu labele ba vota, komesa loron 20 fulan Fevereiru ba to’o iha tempu eleisaun polísia sei hala’o nia servisu”, dehan nia, iha atividade edukasaun sívika, iha Kampus Universidade Dili (UNDIL), horisehik.

Nia hatutan, hahalok ida ne’e obstrusaun kontra liberdade eskolla kada sidadaun nian no nia kastigu sei hetan pena priszaun to’o tinan tolu iha kadeia.

“Kuandu sé maka halo no nia atu ativista fali husi ida ne’ebé, nia atu pesoál privadu ruma, kuandu halo deklarasaun kona-ba apela ba ema atu golput ka labele vota, ne’e polísia sei halo nia servisu kona-ba ida ne’e”, tenik Duarte.

Nia informa, iha lei Kódigu Prosesu Penál (KPP) hateten, hahalok ne’e obstrusaun kontra liberdade eskolla kada sidadaun sira nian no ida ne’e atu terminál ne’ebé tama iha krime eleitorál.

Tanba ne’e, husu atu iha loron silénsiu hafoin kampana, sidadaun ida-idak mak atu deside nia desizaun rasik molok tama atu ba iha eleisaun.

Tuir kalendáriu ne’ebé CNE aprova no públika ona, oráriu ba kampana konta dezde loron 10 Abríl 2018 to’o 9 Maiu 2018, durante loron tomak no la haree ba loron Sábadu ka Domingu.

Independente

Sem comentários: