FMSS Kontinua Promove Ambiente Moos

DILI, (TATOLI) - Fakuldade Medisina no Siénsia Saúde (FMSS), Universidade Nasionál Timor Lorosa’e (UNTL) kontinua halo limpeza hodi promove ambiente ne’ebé mak moos hodi komunidade sira bele moris saudável.

“Ami estudante iha area saúde nian presiza promove ambiente ne’ebé moos. Ita hatene katak orientasaun akadémika ne’ebé la’o durante loron hirak ne’e, ita prienxe de’it ho palestra ho atividade sira ne’ebé mak liga liu ba parte akadémiku nian, entaun la konsege realiza limpeza”, dehan Xefe Asosiasaun Akadémika Estudantil (AAE) FMSS, Adão do Carmo, iha kampus Lahane, sábadu ne’e.

Xefe AAE ne’e hatutan depois orientasaun hotu aula seidauk la’o normál, segunda mak la’o normál, entaun sira hanoin katak sábadu ne’e mobiliza estudante sira para halo limpeza jerál, nune’e bele kria ambiente ne’ebé moos.

Liliu bele sai ezemplár ba komunidade sira katak ambiente moos ne’e mak sei kontribui ambiente saudável ba ita hotu.

Nia reforsa limpeza nu’udar kultura ida ba FMSS, tinan-tinan molok tinan akadémiku foun hahú sempre kria atividade sira ne’ebé mak hanesan no seluk tan.

“Ne’e inisiativa husi asosiasaun, foin dadauk hetan tan apoiu husi diretór eskola superiór teknolojia no saúde ne’ebé mak kompostu husi kursu nutrisaun, farmásia. Ami kolabora hamutuk”, dehan estudante enfermajen ne’e.

Estudante foun, Agina Diana Ribeiro Cabral, husi kursu nutrisaun akresenta hamoos ambiente nu’udar fatór báziku ba sira Fakuldade Medisina, Siénsia no Saúde. Tan ne’e limpeza importante tebes.

“Limpeza nu’udar evidénsia katak Fakuldade Medisina, Siénsia no Saúde fakuldade ne’ebé hadomi ambiente”, tenik estudante ne’e.

Nia mós hato’o mensajen ba FMSS, UNTL atu kontinua nafatin atividade ne’e tanba atividade ne’e nu’udar fatór báziku ba sira.

“Ha’u hanoin kontinua nafatin tanba saúde ne’e importante. Tan ne’e se bele karik kontinua nafatin; semana ida dala ida”, sujere estudante foun, Agina Diana.

Entretantu antes ne’e, Xefe Senadu FMSS, Adão do Carmo, ba ajénsia TATOLI hateten tuir lema UNTL nian estuda, peskiza no dedikasaun ba komunidade, tanba ne’e hanesan universitáriu ne’ebé estuda iha área saúde presiza sai mós modelu ba komunidade sira liuhusi dedikasaun.

“Presiza sai ezemplár ba komunidade kona-ba oinsá moris iha ambiente saudável”, esplika.

Estudante enfermajen ne’e esplika mós bainhira soe lixu la tuir nia fatin sei fó impaktu ba saúde, liuliu iha tempu udan.

Impaktu ne’e mak hanesan fo’er barak halo intupidu ba bee no fó fatin ba susuk sira hodi moris no hada’et moras. Seluk, bainhira soe fo’er arbiru bele hamosu inundasaun iha tempu udan.

Tanba ne’e husu ba ministériu kompetente nomós komunidade katak organiza funsionáriu públiku atu halo limpeza no konsiénsiliza aan atu kontribui ba ambiente saudável.

Notísia relevante, http://www.tatoli.tl/2017/03/prevene-moras-estudante-fmss-halao-limpeza/

Jornalista: Rafy Belo | Editora: Rita Almeida

Imajen: Estudante FMSS sira halibur fo’er iha lixeiru. Foto: Mídia UNTL