domingo, 18 de fevereiro de 2018

KO identifika ema besik 1000 falsifika dokumentus


Komisaun Omenajen (KO), identifika ema besik 1000 mak falsifika dokumentus hodi hetan pensaun veteranus husi Estadu.

Ita la nega dehan laiha ema mak falsifika dokumentus. Ami identifika, ami mós kansela barak ona, ami kansela besik 1000  ona, maibe atu dehan hotu-hotu falsu ne´e ita haree lai,  ema ne´e  uluk halo nusa, se nia joven ida nia hetan 8 a 14  ne´e  husi  ne´ebé, se nia sobrevivente konserteza nia  8 a 14, tanba  hotu-hotu liu husi 12 Novembru atu mate moris sira nian mak ne´e,esplika Prezidente KO Supervizaun Rejistu  no Rekursu, Virgílio Smith, ba  jornalista sira, Kinta (15/02/18), iha edifisiu KO, Caicoli, Díli.

Dokumentus ne´e dadus  primeiru rejistu  ba veteranu sira iha tinan 2003  to´o 2005 hamutuk 76 mil, maibe  husi  total rejistu ba ema  76 mil,  maibe iha ema 40 mil ital  mak hetan pensaun husi Estadu ho kategoria  4 a 7,    8 a 14,  no  15 a 19  ho tan 20 a 24.

“Ne´ebé  Prestasaun Pekunaria Unika (PPU) simu  osan dala ida de´it mak 4 a 7,   depois pensaun subsistensia no idozus  ne´e mak 8 a 14,   no  pensaun espesial da reforma skalaun 1 mais 20 a 24,  Sklaun 2  mak 15 a 19, maibe ba 8 a 14 laiha skalaun. Imajina de´it husi 76 mil de rejistu para to´o final agora dadauk  ne´e so 40  mil ital mak dereitu simu sira nia pensaun”, dehan Virgílio Smith.

Virgílio Smith,  husu Polísia Nasionál Timor-Leste (PNTL) atu  kaptura veteranus falsu ne´ebé mak halo kobransa ilegal, hodi submete ba prosesu investigasaun.

“Halo kobransa ilegal  ne´e krimi, se ita ba halo kobransa ne´e finalidade saida nian, se nia identifika a´an hanesan vetaranu ho saida nia organizasaun saida,  ida ne´e ita presiza hatene”, dehan Virgílio Smith.

Veteranu balun  halo kobransa ilegal

Nune’e mos membru Komisaun Omenajen Supervizaun Rekursu no Rejistu, Custódio  Belo `Alin Laek´ konsidera  ema  ne´ebé mak lori naran veteranus halo kobransa ilegal ba  komunidade ne´e krimi organizadu.

Custódio  Belo `Alin Laek´ hato´o  lia hirak ne´e relasiona ho grupu organizadu uza naran veteranu hodi halo kobransa ilegal ba komunidade sira, maibe  Servisu Investigasaun Kriminal Polísia konsege identefika grupu  organizadu ne´e no konsege lori ba submete  ba prosesu investigasaun  iha Kuartel Jeral PNTL iha loron (12/02/18).

Alin Laek dehan, KO ninia  ema  organizadu iha terenu atu halo verifikasaun dadus la ejisti, komisaun homenajen  iha nia mandatu atu simu orden  ruma  husi orgaun kompetente atu tun ba terenu ho prazu kuandu prazu  hotu laiha tan ema  iha terenu ne´eba.

“Karik sira  iha terenu  ne´eba mak sala sira nia responsavel rasik mak mai hodi hasoru Komisaun Homenajen para bele hadia rasik, laiha seluk ida  iha Timor oan verifika ema nia dadus, tanba la simu mandatu,” dehan Alin Laek.

Nia hatutan, iha funu nia laran sira iha  obrigasaun halo kobransa ba ema ne´ebé mak hakarak fó apoiu ba frente  armada.

“Bisoi la´os nia fó ordem ba sel-seluk para halo kobransa,  kobransa ne´e halo saida nian,  sira  ha´u hateten tama ba  grupu krimi organizadu,  krimi organizadu ne´e buras los  iha Timor-Leste”, esplika  Alin Laek.

Tanba  ne´e Alin Laek, husu atu hatama  ema sira  ne´ebé mak involve a´an iha grupu organizadu hirak ne´e ba kadeia.

“Uluk  rezistensia grupu Loriku Mate Duutu mak iha  ne´ebé tuir rejistu sira bolu dehan kaixa da rezistensia, agora ema ne´ebé mak rejistadu ona ne´e la´o tuir regra  ne´ebé mak iha”, dehan  Alin Laek.

Entretantu  relasiona ho informasaun ne´ebé mak temi husi Veteranu Alin Laek,   dehan grupu organizadu husi  loriku Mate Duutu mak  halo kobransa ilegal, wainhira GMN tenta konfirma  responsavel  grupu Loriku  Mate Duutu atual Deputada Bisoi, liu husi liña telemovel atu halo entrevista, maibe deputadu Bisoi responde hodi hateten, agora dadauk seidauk bele koalia ba públiku, tanba sei halibur veteranu hotu atu bele halo konferensia imprensa iha semana oin. avi

GMN TV | Grupo Média Nacional

Sem comentários: